Хитайниң сичүән өлкисидә қоғушундин зәһәрлиниш һадисиси йүз бәрди

Хитайниң сичүән өлкисидә қоғушундин зәһәрлиниш һадисиси йүз берип, 100 гә йеқин адәмдә зәһәрлиниш әһвали бир қәдәр еғир болған.
Мухбиримиз җүмә
2010.03.15

Хитай ахбарат васитилиридә көрситилишичә, зәһәрләнгүчиләрниң көп қисми өсмүрләр икән. Нәтиҗидә, хитай һөкүмити бу хил юқумлинишни кәлтүрүп чиқарғанлиқи тәхмин қилинған завутни тақивәткән.

Шинхуа ахбарат агентлиқиниң хәвәрлиригә қариғанда, сичүән өлкиси лоң чаң наһийиси дүшәнбә күни, мәзкур наһийигә җайлашқан җуңйи бирикмә метал ширкитигә йеқин олтурақлашқан 1600 адәм үстидин тәкшүрүш елип барған.

Тәкшүрүш нәтиҗисидә 94 адәмдә қоғушундин зәһәрлиниш әһвали көрүнгән болуп, буларниң 88 нәпири өсмүрләр икән. Тәкшүрүш пәқәт мәзкур завутниң 800 метир даирисидики аһалә үстидин елип берилған. Нөвәттә йәнә 745 нәпәр адәм тәкшүрүш нәтиҗисини күтмәктә икән.

Хитай ахбаратлири дүшәнбә күни тарқатқан хәвәрләргә қариғанда, нөвәттә лоң чаң наһийилик һөкүмәт әмәлдарлири җуңйи бирикмә метал ширкити үстидин тәкшүрүшни башливәткән.

Қоғушундин зәһәрлиниш хитайда бир қәдәр еғир көрүлиду. Өткән йили хенән өлкисидә 1000 нәпәргә йеқин өсмүрниң қоғушун билән зәһәрләнгәнлики испатланған.
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.