Xitayning sichü'en ölkiside qoghushundin zeherlinish hadisisi yüz berdi

Xitayning sichü'en ölkiside qoghushundin zeherlinish hadisisi yüz bérip, 100 ge yéqin ademde zeherlinish ehwali bir qeder éghir bolghan.
Muxbirimiz jüme
2010.03.15

Xitay axbarat wasitiliride körsitilishiche, zeherlen'güchilerning köp qismi ösmürler iken. Netijide, xitay hökümiti bu xil yuqumlinishni keltürüp chiqarghanliqi texmin qilin'ghan zawutni taqiwetken.

Shinxu'a axbarat agéntliqining xewerlirige qarighanda, sichü'en ölkisi long chang nahiyisi düshenbe küni, mezkur nahiyige jaylashqan jungyi birikme métal shirkitige yéqin olturaqlashqan 1600 adem üstidin tekshürüsh élip barghan.

Tekshürüsh netijiside 94 ademde qoghushundin zeherlinish ehwali körün'gen bolup, bularning 88 nepiri ösmürler iken. Tekshürüsh peqet mezkur zawutning 800 métir da'irisidiki ahale üstidin élip bérilghan. Nöwette yene 745 neper adem tekshürüsh netijisini kütmekte iken.

Xitay axbaratliri düshenbe küni tarqatqan xewerlerge qarighanda, nöwette long chang nahiyilik hökümet emeldarliri jungyi birikme métal shirkiti üstidin tekshürüshni bashliwetken.

Qoghushundin zeherlinish xitayda bir qeder éghir körülidu. Ötken yili xénen ölkiside 1000 neperge yéqin ösmürning qoghushun bilen zeherlen'genliki ispatlan'ghan.
Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.