Tuwadiki qedimki Uyghur qel'esini qurush xizmiti toxtap qalghan

Rusiye metbu'atliridiki uchurlardin melum bolushiche, ötken ikki yil ichide qedimki Uyghur qaghani moyunchurning miladi 750 - yilliri etrapida Uyghur qoshunlirini bashlap, tuwa rayonini ishghal qilghandin kéyin qurghan mezkur qel'eni eslige keltürüsh shuningdek bu jayda keng kölemlik arxé'ologiyilik qézish élip bérish heqqidiki xewerler rusiye we xelq'arada melum derijide qiziqish peyda qilghan idi. Shuning bilen bir waqitta yene mezkur qel'ening qurulush we weyran bolush sewebliri heqqide türlük qiyaslar otturigha qoyulghan.

Por - bajin qedimki Uyghur qel'esi heqqide yene rusiye dölet téléwiziyisimu mexsus chong hejimlik höjjetlik filim ishlep, pütün rusiyige tarqatqan, bu jayni hetta sabiq rusiye prézidénti wladimir putin özi biwasite ziyaret qilip, bu qurulushni qollaydighanliqini bildürgen idi.
 
Por - bajin tor bétidiki uchurlargha qarighanda, eyni waqitta rusiye hökümiti yene por - bajin qel'esini tetqiq qilish we qurup chiqish ishliri boyiche bir rehberlik hem meslihetchilik orgini qurup chiqqan bolup, buninggha rusiye jiddiy ishlar ministiri, tuwa millitidin bolghan shoygu, moskwa shehirining bashliqi lushkow hemde bashqa bir qanche muhim dölet rehberliri kirgen idi.

Bu jayda rusiyining tuwa we bashqa sheherliridiki uniwérsitétlarning 600 din artuq arxé'ologiye hem tarix kespidiki oqughuchisi rusiyining bir qisim ataqliq alimlirining yétekchilikide ikki yil arxé'ologiyilik qézish we tekshürüsh ishliri élip bérip, por - bajin qurulushining tekshürüsh we tetqiqat xizmetliri tamam qilin'ghan, emdiki nöwet, qel'eni qaytidin qurup chiqish bolup, hetta qel'ening modélimu teyyarlan'ghan iken.

Biraq, rusiye penler akadémiyisining bir ilmiy xadimining éytishiche, qel'eni qayta qurush ishimu toxtap qalghan bolup, bu belki iqtisadiy kirizis bilen munasiwetlik bolushi mumkin iken. Tuwa jumhuriyitide por - bajindin bashqa yene 17 qedimki Uyghur qel'esi barliqi melum.