Қәшқәр оттура сот мәһкимиси ' бөлгүнчиликкә қарши күрәш' тики нәтиҗилири билән мукапатланди

Хитай алий соти қәшқәр оттура сот мәһкимисини" бөлгүнчиликкә қарши күрәш " ниң алдинқи сепидә көрсәткән хизмәт нәтиҗилири үчүн биринчи дәриҗилик төһпә мукапати билән һәмдә пүтүн вилайәт тәвәсидики барлиқ сот мәһкимилирини иккинчи дәриҗилик төһпә мукапати билән тартуқлиған.
Мухбиримиз гүлчеһрә
2009-04-28
Елхәт
Пикир
Share
Принт

Уйғур ели хәвәр ториниң бу һәқтә елан қилған хәвиридин ашкарилинишичә, қәшқәр оттура сот мәһкимиси, мәһкимини сиясәт бойичә башқурушни әмәлийләштүргәнлики, сотниң партийигә, дөләткә садиқ болуш, дөләт бихәтәрлики, шинҗаңниң сиясий муқимлиқини ишқа ашуруш низамида чиң турғанлиқи үчүн партийә һәм һөкүмәтниң юқири баһасиға еришкән икән.

Хитай һөкүмити сот вә қанун даирилириниң мустәқил гәвдә икәнликини һәмдә хитайда қанун билән башқуруш қәдимини ишқа ашуруп келиватқанлиқини тәкитләп кәлмәктә иди. Һалбуки инсан һәқлири тәшкилатлири хитайда болупму уйғур елидә әдлийә қанун орунлири шундақла барлиқ дөләт аппаратлириниң, хитай коммунистик партийә һөкүмитиниң сиясити үчүн хизмәт қилидиғанлиқини илгири сүрүп бундақ бир түзүлмә астида хәлқниң қануний һоқуқи вә яки инсан һәқлириниң илгири сүрүлүшидин сөз ечиш мумкин әмәсликини оттуриға қоймақта.

Қәшқәр оттура соти қәшқәр сәмән йоли вәқәсидә әсир елинған абдурахман азат һәмдә қурбанҗан һимиткә өлүм җазаси елан қилип өткән айда иҗра қилған иди, буниң алдида қәшқәр қоширап вәқәсидә қолға елинған 17 нәпәр уйғурму қәшқәр оттура сотида бөлгүнчилик, дөләтни парчилашқа урунуш җинайәтлири билән әйиблинип еғир җазаға һөкүм қилинған иди.

Уйғурлар әң зич олтурақлашқан шундақла уйғурларниң хақанийисигә символ, қәдимий, тарихий вә мәдәнийәт мәркизиниң бири болған қәшқәр дияри әзәлдин хитайниң сиясәтлири әң еғир һәм җиддий йүргүзүлүватқан җай болуп кәлмәктә.

Хитайниң уйғур елигә қойған партком секретари ваң лечүәнниң сөзи бойичә алғанда: қәшқәр хитайниң " миллий бөлгүнчиликкә қарши күрәшниң әң алдинқи сепи."


Пикирләр (0)
Share
Толуқ бәт