Qeshqer ottura sot mehkimisi ' bölgünchilikke qarshi küresh' tiki netijiliri bilen mukapatlandi

Xitay aliy soti qeshqer ottura sot mehkimisini" bölgünchilikke qarshi küresh " ning aldinqi sépide körsetken xizmet netijiliri üchün birinchi derijilik töhpe mukapati bilen hemde pütün wilayet tewesidiki barliq sot mehkimilirini ikkinchi derijilik töhpe mukapati bilen tartuqlighan.
Muxbirimiz gülchéhre
2009-04-28
Élxet
Pikir
Share
Print

Uyghur éli xewer torining bu heqte élan qilghan xewiridin ashkarilinishiche, qeshqer ottura sot mehkimisi, mehkimini siyaset boyiche bashqurushni emeliyleshtürgenliki, sotning partiyige, döletke sadiq bolush, dölet bixeterliki, shinjangning siyasiy muqimliqini ishqa ashurush nizamida ching turghanliqi üchün partiye hem hökümetning yuqiri bahasigha érishken iken.

Xitay hökümiti sot we qanun da'irilirining musteqil gewde ikenlikini hemde xitayda qanun bilen bashqurush qedimini ishqa ashurup kéliwatqanliqini tekitlep kelmekte idi. Halbuki insan heqliri teshkilatliri xitayda bolupmu Uyghur élide edliye qanun orunliri shundaqla barliq dölet apparatlirining, xitay kommunistik partiye hökümitining siyasiti üchün xizmet qilidighanliqini ilgiri sürüp bundaq bir tüzülme astida xelqning qanuniy hoquqi we yaki insan heqlirining ilgiri sürülüshidin söz échish mumkin emeslikini otturigha qoymaqta.

Qeshqer ottura soti qeshqer semen yoli weqeside esir élin'ghan abduraxman azat hemde qurbanjan himitke ölüm jazasi élan qilip ötken ayda ijra qilghan idi, buning aldida qeshqer qoshirap weqeside qolgha élin'ghan 17 neper Uyghurmu qeshqer ottura sotida bölgünchilik, döletni parchilashqa urunush jinayetliri bilen eyiblinip éghir jazagha höküm qilin'ghan idi.

Uyghurlar eng zich olturaqlashqan shundaqla Uyghurlarning xaqaniyisige simwol, qedimiy, tarixiy we medeniyet merkizining biri bolghan qeshqer diyari ezeldin xitayning siyasetliri eng éghir hem jiddiy yürgüzülüwatqan jay bolup kelmekte.

Xitayning Uyghur élige qoyghan partkom sékrétari wang léchüenning sözi boyiche alghanda: qeshqer xitayning " milliy bölgünchilikke qarshi küreshning eng aldinqi sépi."


Toluq bet