4-Айдин башлап қәшқәр билән хоңкоң арисида айропилан қатниши йолға қоюлиду
2012.03.23
Шинхуа ахбарат агентлиқиниң җүмә күни хәвәр қилишичә, хитайниң җәнуб һава йоллири қәшқәр-хоңкоң арисида йеңи һава йоллири ечишни қарар қилған. Хәвәрдә, буниң икки район арисидики иқтисади, мәдәнийәт алмаштурушни күчәйтип, һәмкарлиқни алға сүридиғанлиқи қәйт қилинған.
Қәшқәр-хоңкоң арисида айропилан қатнишини йолға қоюш қарари, хитай һөкүмити “5-июл вәқәси” дин кейин уйғур илидики шәһәрләрни кеңәйтип, мәбләғ селиш, көчмәнләрни йөткәш вә байлиқ ечишни тезлитиш пилани йолға қойғандин буян, чиқарған муһим қарарлириниң биридур.
Хәвәрләрдин мәлум болушичә, қәшқәрлик шәһәрлик һөкүмәт билән хитайниң җәнуб һава йоллири ширкити җүмә күни һава қатнишини йолға қоюш һәққидики бир келишимгә имза қойған. Омумий учуш мусаписи 6 саәт 40 минут болуп, айропилан үрүмчидә тохтап өтидикән.
Уйғур илини йеқиндин көзитип келиватқан бәзи көзәткүчиләрниң илгири сүрүшичә, мәзкур һава йоли қатниши асаслиқи қәшқәр вилайити вә униңға қошна әлләргә мәбләғ салидиған хоңкоң вә авменлиқ содигәрләргә қулайлиқ яритишни мәқсәт қилған.