Birleshken döletler teshkilati: "qirghizistandiki özbék mehbusliri ten jazasigha uchrawatidu"

Birleshken döletler teshkilati kishilik hoquq ishliri bölümining yuqiri derijilik emeldari pi'ér, seyshenbe küni muxbirlarning ziyaritini qobul qilghinida bu xewerni delilligen. Uning déyishiche, uning qol astidiki xizmetchi xadimlar tapshuruwalghan uchurlardin melum bolushiche, qirghizistan bixeterlik da'iriliri weqege munasiwetlik dep qarighan özbéklerge nisbeten, qanunsiz tutqun qilish, qiynash wasitilirini qollan'ghan. Ular tapshuruwalghan melumatlarda, qirghizistan bixeterlik da'iriliri qolgha élin'ghan özbéklerge qarita, tamaka choghi arqiliq köydürüsh, tirnaqlirini sughuruwélish, miltiq payniki yaki saqchi kaltekliri bilen urush arqiliq mejburiy iqrar qildurush wasitilirini qollanmaqta iken.

Pé'ir sözide yene qirghizistan bixeterlik etriti xadimlirining soraq jeryanida bu xil qiynash wasitilirini qollinishi, qirghizistan dölet qanuni hem xelq'ara qanunlargha xilap bolup qalmastin, belki qirghizistanning jenubida nahayiti ajiz halette turghan nispiy tinchliq weziyitinimu murekkepleshtürüwétidighanliqini tekitlidi. Eyni chaghdiki özbékler bilen qirghizlar arisidiki étnik toqunushta 2000 dek adem ölgen bolup, melum bolushiche, hazirmu rayon weziyiti yenila jiddiy halette iken.