Qirghizistan da'iriliri yawrupa bixeterlik we hemkarliq teshkilati qisimlirining öktebirdiki saylamdin kéyin kélishini muwapiq körmekte

Qirghizistan da'iriliri bügün yawrupa bixeterlik we hemkarliq teshkilatigha a'it bixeterlik saqlash küchlirining öktebirdiki saylamdin kéyin kélishini ümid qilidighanliqini bildürdi.
Muxbirimiz irade
2010.09.02

Roytérs agéntliqining xewer qilishiche, eslide yawrupa bixeterlik we hemkarliq teshkilatigha a'it 52 neper qoralsiz saqchining qirghizistandiki bixeterlikini saqlash üchün 8 - ayda qirghizistan'gha kélishi pilan qilin'ghan idi.

Emma, qirghizistanning yawrupa bixeterlik we hemkarliq teshkilatidiki elchisi lydiya iman'aliyiwa bügün bu heqte bayanat bérip, "buzghunchi küchler bixeterlikni saqlash küchlirining qirghizistan'gha kélish pilanini bahane qilip, qaytidin qalaymiqanchiliq chiqirishqa urunuwatidu. Bixeterlikni saqlash küchliri qirghizistanda 10 - ayda ötküzülidighan parlamént saylimidin kéyin kelse téximu muwapiq we ünümlük bolidighanliqigha ishinimiz" dédi.

Roytérsning bayan qilishiche, elchi lydiyaning bu sözi yawrupa bixeterlik we hemkarliq teshkilatigha a'it saqchi qisimning qirghizistan'gha kirishining kéchiktürülidighanliqidin bisharet béridiken.

Qirghizistanda bu yil 6 - ayda qirghizlar bilen özbékler arisida qanliq toqunush yüz bergen idi. Weqede asasliqi özbéklerdin bolup, 400 din artuq kishi ölgen. 400 Ming kishi öy - makanliridin ayrilip musapir bolghan idi.

Gerche weqedin kéyin rayondiki özbékler xelq'ara qisimlardin özini qoghdashni telep qilghan bolsimu, emma qirghiz hökümiti buninggha yol qoymay kelgen. Ötken ayda qirghizistanning osh shehiride yawrupa bixeterlik we hemkarliq teshkilatigha a'it saqchi qisimining qirghizistan'gha kélishige qarshi naraziliq namayishliri ötküzülgen idi.
 
Yéqinda xelq'araliq krizis guruppisi weqe heqqide doklat élan qilip, hazirqi qirghiz hökümitining xelq'araliq tekshürüsh ömekliri we xelq'ara xewpsizlikni qoghdash qisimlirining rayon'gha kélip weziyetni kontrol astigha élishigha qet'iy yol qoymay kéliwatqanliqini eyiblep, eger waqtida tedbir almighan teqdirde, bu étnik toqunushning qirghizistandiki Uyghur, tatar, tunggan qatarliq bashqa étnik guruppilarghimu tarilip kétidighanliqi heqqide agahlandurghan idi.
 
Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.