Қирғизистан президент сайлимида җәнуб-шимал тоқунуши йүз бериш еһтималлиқи әндишә пәйда қилди

Қирғизистан президент сайлими йәкшәнбә күни елип берилиду. Бирақ сайламға аз қалғанда җәнублуқ қирғизлар билән шималлиқ қирғизлар арисидики мәдәнийәт пәрқи, сайламниң мувәппәқийәтлик елип берилишиға тәһдит селип, тоқунуш пәйда қилиш еһтималлиқи әндишә қозғиған.
Мухбиримиз әркин
2011.10.28

Алдинқи қатардики намзатлардин, җәнублуқ қирғизлардин болған қамбибек ташийеф җүмә күни агаһландуруп, әгәр сайламда сахтипәзлик көрүлсә, “милйонлиған” киши қозғилип, қирғизистан һөкүмәт рәһбәрлирини ағдуруп ташлайдиғанлиқини билдүргән.

Ташийефниң тәһдитиниң президент намзатлиридин бири болған шималлиқ қирғизлардин баш министир алмазбек атамбайефқа қаритилғанлиқи ениқтур. Алмазбек атамбайеф, сабиқ президент қурманбек бақийев ағдурулуп, қирғизистан парламент түзүмидики дөләткә айланғандин кейин баш министирлиққа олтурған тунҗи һөкүмәт рәһбири.

Йәкшәнбә күнки сайламда ким ғәлибә қилса, у келәр йили кириштин бурун өткүнчи президент роза отунбайевадин һоқуқни өткүзүвалиду. Лекин сайламниң адил елип берилиши вә башқа кандидатларниң сайламда ғәлибә қилған намзатни етирап қилиш-қилмаслиқи йәнила ачқучлуқ мәсилә.

Қамбибек ташийеф қоллиғучилирини әгәр сайламниң адил елип берилғанлиқидин гуман қилса, сайлам нәтиҗисини рәт қилишқа чақирған.

Хәвәрләрдин мәлум болушичә, баш министир атамбайеф қирғизистандики сиясий мөтивәрләр билән көрүшүп, президентлиққа сайлинип қалса, шимал билән җәнуб арисидики ихтилапни қандақ һәл қилиш мәсилисини музакирә қилған.

Бәзи анализчилар атамбайеф сайланса, җәнуб билән шималниң парламент башлиқи вә баш министирлиқни талишип, буниң йәнә ихтилап пәйда қилидиғанлиқини билдүрди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.