Қирғизистан чегра сақчиси 4 сәпдишини етип өлтүргән

Гумандар вәқәни садир қилғандин кейин, әтрапта тохтитилған бир аптомобилни һәйдәп, мәйдандин ғайиб болған. Франсийә ахбарат агентлиқиниң хәвәр қилишичә, нөвәттә қирғизистан раветчилири мәзкур җинайәт гумандарини издимәктә. Разветчилар һазирға қәдәр вәқәниң йүз бериш сәвәби һәққидә мәлуматқа еришәлмигән.

Қирғизистандики бу вәқә иссиқ көлдин 65 километир җәнубта, йәни қирғизистан, қазақистан, уйғур райониниң чегралири арисида йүз бәргәчкә, вәқә вәзийәт көзәткүчилиригә сирлиқ билинмәктә. Чүнки қазақ сақчилири өткән һәптә мәзкур райондики бир бағчидин көйдүрүп өлтүрүветилгән 11 кишиниң җәситини тапқан.

Мәзкур вәқәдә йәнә бағчә муһапизәтчисиниң оғли елип қечилған болуп, нөвәттә қазақ сақчилири елип қечилған балини тепиш вә җинайәт гумандарлирини тутуш үчүн һәрикәт елип бармақта. Икки айниң алдида йәнә чеграда вәзипә өтәватқан бир нәпәр қазақ сақчисиму өзиниң 14 нәпәр сәпдишини өлтүрүп қаравулханини көйдүрүвәткән. Охшаш районда арқа-арқидин йүз бериватқан бу вәқәләр көзәткүчиләрдә мәзкур районниң иҗтимаий вә сиясий вәзийитидә йошурунған муқимсизлиқ амиллири һәққидә ойлиниш пәйда қилмақта.