Уйғур елидин йәнә бир түркүм уйғур қизлири хитай өлкилиригә елип меңилди

Уйғур елидин йәнә бир түркүм уйғур қизлири хитай өлкилиригә елип меңилди. Дәл шу пәйттә, уйғур елигә җайлашқан биңтуән хитай өлкилиридин кәлгән зор түркүмдә аққун ишчиларни қобул қилди.
Мухбиримиз җүмә
2009.08.31

Шинхуа ахбаратида хәвәр қилинишичә, бу нөвәт хитай өлкилиригә йолға селинған уйғур қизлири хотән вилайити чира наһийисидин болуп, җәмий 115 нәпәр. Булар чиңдавға җайлашқан "чиңдав тәйгуаң аяғчилиқ ширкити"гә бир йиллиқ тохтам билән елип меңилған.

Хәвәр көрситилишичә, бу һәқтики учурлар биңтуән иҗтимаий капаләт вә әмгәк идариси кәсип тонуштуруш бөлүмидин игиләнгән. Хитай аққун ишчилар асасән хенән, гәнсу вә чуңчиң қатарлиқ өлкә районлардин елип келинидикән.

Мәлум болушичә, бу йил биңтуән 7 милйон мо кевәз териған болуп, кевәз териш үчүн 50 миң ишчиға еһтияҗлиқ икән.

Хәвәрдә нәқил қилинишичә, чира наһийилик әмгәк күчлирини сиртқа йөткәш ишханисиниң мудири алимҗан әйсақ, бу йил мәзкур наһийә "чиңдав тәйгуаң аяғчилиқ ширкити" билән 300 ишләмчи йәткүзүп бериш тохтами түзгән.
Хитай һөкүмити 2004 - йилдин буян, уйғур елидә хизмәт пурситиниң кәмлики, әмма әмгәк күчлириниң артуқлуқини баһанә қилип, уйғур елидин яш әмгәк күчлирини хитай өлкилиригә йөткә кәлмәктә иди.

Мәзкур уйғур "әмгәк күчлириниң" арисида қизларниң көп болуши, уйғур җамаити арисида күчлүк наразилиқ қозғиған.

Нәтиҗидә, мәзкур сиясәтниң "26 - июн шавгуән вәқәси" вә "5 - июл үрүмчи вәқәси" гә сәвәб болғанлиқи билдүрүлмәктә.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.