Qurban héytqa teyyarliq qilinmaqta

Musulmanlarning eng chong héytliridin biri bolghan qurban héyti yéqinliship qalmaqta. Qurban héyt namizining 11 - ayning 15 - yaki 16 - chéslasining qaysisida oqulush mesiliside dunyaning her qaysi jayliridiki musulmanlar arisida qismen oxshimighan perezler bar idi.
Muxbirimiz ümüdwar
2010-11-07
Share

Se'udi erebistan hökümiti bu yilqi qurban héyt namizining 16 - noyabir küni oqulidighanliqini élan qilghan. Bu heqte xitayning shinxu'a agéntliqimu uchur tarqitip, xitay tewesidiki musulmanlargha namaz küni heqqide bisharet bergen.

Amérika paytexti washin'gton shehiri yénidiki türk jama'itining meschitidimu, ötken jüme küni, qurban héyt namizining amérikida 16 - noyabir küni oqulidighanliqi élan qilinip, barliq türk, Uyghur we bashqa musulman jama'etliri birlikte namaz oqushqa chaqirilghan.

Fe'irfekis shehiri we uning etrapidiki Uyghurlarning köp qisimi bir qanche yildin buyan türkler bilen birlikte héyt namizi oqup, héytni tebriklimekte.  Fe'irfekis shehiride yashaydighan bir moysipitning éytishiche, bundaq bolushidiki sewebte türkler bilen Uyghurlarning qérindashliqi, til we tarixi ortaqliqi hem yéqinliqi muhim rol oynighan. U özining türk imamning hemme sözlirini asasen chüshinidighanliqini bildürdi. Uning üstige yene, ötken yilidiki ürümchi weqesidin kéyin, türkiye hökümiti we xelqining Uyghurlargha bolghan hésdashliqi, Uyghurlarning türkler bilen bolghan munasiwetlirini téximu qoyuqlashturghan.

Bu yilqi hej pa'aliyitimu bashlinish aldida turmaqta. Hazir dunyaning her qaysi jayliridin kelgen ikki milyondin artuq musulmanning mekke we medinige jem bolghanliqi xewer qilinmaqta. Emma, xitay hökümitining bu yil Uyghur élidin zadi qanchilik Uyghur musulmanning hej qilishigha ruxset qilghanliqi éniq emes. Bir diniy zat pasport élish qiyinchiliqi tüpeylidin köpligen Uyghurlarning shexsiy yollar bilen hej pa'aliyiti qilishining tosqunluqqa uchrawatqanliqini inkas qildi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet