Amérikidiki quyash énérgiyisi taxtisi shirketliri xitayning üstidin erz qildi

Amérikidiki quyash énérgiye taxtisi ishlep chiqiridighan shirketler xitayni quyash énérgiye mehsulatlirini dunya bazirida tökme qilip sétip, bahani kasatlashturush bilen eyiblidi.
Muxbirimiz irade
2011.10.20

Birleshme agéntliqining xewer qilishiche, amérikidiki quyash énérgiyisige munasiwetlik 7 shirket charshenbe küni amérika soda ministirliqi we xelq'ara tijaret komitéti bilen birlikte xitayni eyibleydighan doklat teyyarlap, buni amérika hökümitige yollighan. Ular amérika hökümitidin xitayning quyash énérgiye mehsulatliridin yüz pirsent baj élishni telep qilghan.

Xitay hökümiti adil tijaret usullirigha xilap halda öz shirketlirige maliye yardimi bérish arqiliq tennerxni töwenlitip, éksportni ashurush bilen eyiblen'gen. Amérika quyash énérgiye shirkitining bashliqi gordon birinsér amérika hökümitige yollighan doklatida: xitay naheq wasitiler arqiliq dunya bazirigha kiriwatidu. Bolmisa xitayning üstünlük igileydighan héchqandaq bir mehsulati yoq, dégen.

Ilgiri bir qisim yawropa elliridiki shirketlermu xitayni xelq'ara tijarette yolsizliq qilish bilen eyibligen, emma xitay bu eyibleshlerni ret qilghan idi. Amérikidiki quyash énérgiye shirketlirining erzigimu xitay da'iriliri téxi héchqandaq ipade bildürmigen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.