Rabiye xanim tünügün amérika yardemchi dölet ishlar ministiri ma'ik poznér bilen körüshti

Xelq'ara Uyghur kishilik hoquq we démokratiye fondi jem'iyiti rabiye xanimning peyshenbe küni dölet ishlar ministirliqidiki emeldarlar bilen körüshkenlikini étirap qilip, kim bilen körüshkenlikini ashkarilashni ret qilghan bolsimu, lékin bezi közetküchiler rabiye xanimning amérika yardemchi dölet ishlar ministiri ma'ik poznér bilen körüshken bolushi mumkinlikini ilgiri sürmekte.

Amérika tashqi ishlar ministirliqi bayanatchisi filip krowly peyshenbe küni etigenlik axbarat élan qilish yighinida yardemchi dölet ishlar ministiri ma'ik poznérning shu küni xitaygha munasiwetlik bezi kishilik hoquq teshkilatlirining rehberliri bilen körüshüp, yéqinda ötküzülgen amérika - xitay kishilik hoquq söhbiti we iqtisad - istratégiye söhbitidin melumat béridighanliqini bildürgen.

Amérika dölet ishlar  ministirliqidiki körüshüsh "5 ‏- iyul weqesi"ning bir yilliqi harpisigha toghra kelgen idi. Shu küni washin'gtondiki Uyghur teshkilatliri "5 - iyul weqesi"ning bir yilliqi munasiwiti bilen axbarat élan qilish yighini chaqirghan.

Axbarat élan qilish yighini amérika dölet ishlar ministirliqidiki uchrishish bilen oxshash waqitqa toghra kélip qalghan bolup, rabiye xanimning axbarat élan qilish yighinida yoqluqi diqqet qozghighan idi.

Terepler dölet ishlar ministirliqidiki körüshüshte sözlen'gen mesililerning détallirini ashkarilimidi. Lékin tashqi ishlar ministirliqi bayanatchisi krolyning bu heqtiki bayanatida ma'ik poznérning "xitay bilen bolghan ikki tereplimilik munasiwetlerde hökümetning  kishilik we siyasi hoquqni muhim orun'gha qoyidighanliqini mu'eyyenleshturudighanliqi" ilgiri sürülgen.