Birleshme agéntliqi xewiride, ramizan éyining Uyghur élidiki siyasi bésim eng kücheytilgen waqit ikenliki otturigha qoyulghan

Birleshme agéntliqida ramizan mezgilidiki Uyghur éli ehwali heqqidiki bérilgen bir parche xewerde, ramizan éyining Uyghur élidiki siyasi bésim eng kücheytilgen waqit ikenliki otturigha qoyulghan.
Muxbirimiz jüme
2008-09-29
Share

Radi'omizmu bu heqte tepsili xewerlerni igilep xewer qilghan idi. Emma birleshme agéntliqida bérilgen bu xewerde alahide tilgha élishqa tégishlik yéri bolsa, Uyghur élide yashaydighan xitaylarning Uyghurlar heqqide éytqanliri we Uyghur yashlirining xitay hazir Uyghur élide yürgüzüwatqan siyaset heqqidiki köz qarashliridur.

Xewerdin melum bolushiche aptor mezkur tepsili xewerni yézish üchün jenubiy Uyghur élining kuchar, qeshqer, yeken qatarliq wilayet nahiyilirini ziyaret qilghan we yerlikler bilen mungdashqan.

Kuchadiki bir xitay shopur muxbiri bilen mungdishish jeryanida: "yipek yolidiki bu güzel sheherni taghlar we chöller orap turidu. Emma bu sheherde Uyghurlar bek köp bolup, mana bu, bu yerdiki birdin - bir mesile," dégen hemde Uyghurlarni " qalaq we terbiye körmigen," dep süretligen.

Halbuki, xitaylar heqqide toxtalghan yerkenlik sodiger memettursun bolsa, özining xitaylarni pes köridighanliqini bildürgen we: "ular hazir markisizm yaki kommunizmgha ishenmeydu. Ular peqet pulghila choqunidu. Pul ularning xudasi" dégen. Qeshqerlik Uyghur sodiger xitayning yol we köwrüklerni peqet Uyghur élige köplep xitay yötkesh üchünla yasawatqanliqini, emma hökümetning nede bésim köp bolsa shu yerde mesilining köp bolidighanliqini untup qalmasliqi kéreklikini bildürgen.

Xewerde körsitilishiche, aptor meyli qeyerge barmisun köpinche hallarda xitay bixeterlik tarmaqliri xadimliri uninggha egishiwalghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet