Rusiye - amérika rehberliri istratégiyilik qorallar mesiliside söhbetleshti

Singaporda échilghan asiya - tinch okyan iqtisadiy hemkarliq teshkilati rehberlirining gheyri resmiy yighini yekshenbe küni yépildi hemde birleshme bayanat élan qilindi.
Muxbirimiz ümidwar
2009.11.15
Share on WhatsApp
Share on WhatsApp

Bu yighinda teshkilatning qurulma islahati élip bérish, iqtisadiy tereqqiyat pursiti yaritish we hawa kilimatining özgirish mesilisige köngül bölüsh qatarliq mesililerde ortaqliqlar hasil bolghan.

"Apek" ning yighini axirlashqandin kéyin, amérika prézidénti barak obama rusiye prézidénti dimétriy médwédéw bilen ayrim körüshüp, ikki döletning arisidiki muhim mesililer heqqide söhbet élip barghandin kéyin, bu yilning axirida amérika bilen rusiye arisidiki "istratégiyilik qorallarni qisqartish kélishimi" ning ornini alidighan yéngi bir kélishimge qol qoyush heqqide muzakiriliship, pikir birliki hasil qilin'ghan.

Rusiyining "newsru" torining xewer qilishiche, obama bilen médwédéw özlirining élip barghan söhbiti we xizmetlirige yuqiri baha bergen bolup, bu qétimqi uchrishish yuqiri qizghinliq ichide ötken.

Moskwa bilen washin'gton arisidiki "istratégiyilik qorallarni qisqartish kélishimi"ning waqti bu yil 5 - dékabirda toshudu. Mezkur kélishimni bikar qilish we yaki shu xilda yéngi kélishim tüzüsh ikki dölet arisidiki muhim mesilige aylan'ghan idi.

Bu heqte obamaning 7 - aydiki moskwa ziyariti jeryanidimu muzakiriler bolghan idi. Buningdin ilgiri obama amérikining sherqiy yawropada qurmaqchi bolghan bashqurulidighan bombidin mudapi'e körüsh sistémisi pilanini emeldin qaldurghanliqi we rusiye bilen hemkarlishishqa teyyar ikenlikini élan qilghandin kéyin, rusiyining mezkur mesilidiki qattiq naraziliqi peseygendek bolghan idi.

Iran yadro mesilisidimu amérika bilen rusiye iranning uranlirini rusiyide tawlap bérishke razi bolghan. Biraq iran hazirghiche bu qedemni basmighan idi. Obama bilen médwédéw bu mesilidimu söhbetleshken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet