Rusiye nopusi azlimaqta

Rusiye dunyadiki yer meydani eng chong, emma nopusi bir qeder az dölet bolushigha qarimay, uning nopusining téz sür'ette azlawatqanliqi rusiye hökümitini endishige salmaqta.
Muxbirimiz ümidwar
2011.03.27

Rusiye metbu'atlirining xewer qilishiche, rusiye nopusshunasliri yéqinqi 40 yil ichide, yeni 2050-yiligha kelgende rusiye nopusi 25 milyon azlap, 140 milyondin 116 milyon'gha chüshüp qalidighanliqini otturigha qoyghan. Rusiyidiki milletler ichide rus millitining köpiyish nisbiti töwen bolup, ruslar barghanséri azlashqa qarap yüzlen'gen.

Rusiye nopusining téz azlishidiki sewebler heqqide izden'gen mutexessisler buningda iqtisadiy amildin bashqa yene bashqa bir qatar ijtima'iy amillarning barliqini otturigha qoydi.

Amérika awazining yézishiche, moskwadiki nopus tetqiqat institutining tetqiqatchisi sérgéy zaxarowning qarishiche, ölüm-yétim ehwalimu buningdiki muhim seweb.

Zaxarow ependi, “Qatnash hadisisi, yarilinish, zeherlinish, qatilliq, suyiqesttin ölgenlerning sani bek köp, zeherlik chékimlikke qarshi turush xuddi urush boluwatqan kolombiye oxshash, addiy xelqler mana shu ishlarning aldini élish kérek” dep tekitligen.

Rusiye bash ministiri putin rusiyidiki nopus azlishining aldini élish üchün yéqinda 50 milyard dollar ajritip, uni köp baliliq bolush, balilar-anilar salametliki qatarliq parawanliq ishlirigha ishlitishni békitken hemde köp bala tughqan ayallarni xuddi sowét dewridikige oxshash qehriman ana dep teqdirleshni qarar qilghan. Ilgiri putin yene sabiq sowét jumhuriyetliridiki 25 milyon rusiyilikni rusiyige qaytip kélip yashashqa chaqirip, meblegh ajratqan idi.

Rusiye mutexessisliri sibiriye we yiraq sherqning téximu xeterlik ikenliki, u yerdiki köpligen ahalilerning yawropa qismigha köchüshi bilen xitaygha yéqin jaylarda nopus azlash körülüwatqanliqidin endishiliniwatqanliqini otturigha qoyushqa idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.