Шаңхәй һәмкарлиқ тәшкилатиға әза дөләтләр рәһбәрлири русийидә учришиду

15 - Июн күни русийә, хитай, қазақистан, қирғизистан, өзбекистан вә таҗикистандин ибарәт шаңхәй һәмкарлиқ тәшкилатиға әза дөләтлириниң алий рәһбәрлириниң 9 - қетимлиқ йиғини русийиниң йекатиринабург шәһиридә өткүзүлиду.
Мухбиримиз үмидвар
2009-06-14
Share

Шаңхәй гуруһидики 6 дөләт башлиқлириниң бу қетимқи йиғинида " шаңхәй һәмкарлиқ тәшкилатиға әза дөләтлириниң инақ қошнидарчилиқ, достлуқ шәртнамиси" әмәлийләштүрүлүш билән бир вақитта йәнә улар арисидики һәрбий, сиясий, иқтисадий, муқимлиқни қоғдаш, малийә вә башқа һәр саһәгә аит мәсилиләр һәққидә пикир алмаштурулуш арқилиқ, мәзкур тәшкилатни техиму күчәйтиш һәққидә йеңи тәклипләр музакирә қилиниши мумкин икән.

Русийә агентлиқлириниң йезишичә, буниң алдида йәнә мустәқил дөләтләр һәмдостлуқи әллириниң бихәтәрликни қоғдаш мәсилилиригә аит йиғини өткүзүлгән иди. Хитайниң шинхуа агентлиқиниң хәвәр қилишичә, хитай рәиси ху җинтав 14 - июн күни йекатиринабург шәһиридә йетип кәлгән, уни русийә муавин ташқи ишлар министири күтүвалған.

Ху җинтав шаңхәй гуруһиниң йиғинидин кейин 16 - июн күни русийә, хитай, бразилийә вә һиндистан рәһбәрлириниң бирләшмә йиғиниға иштирак қилип, мәзкур төт дөләт арисидики һәмкарлиқларни музакирә қилидикән вә 18 - июн күнигичә русийини рәсмий зиярәт қилип, русийә президенти дмитрий медведев, баш министир виладимир путин қатарлиқлар билән көрүшүп, русийә - хитай истратегийилик шериклик мунасивәтлири һәққидә сөһбәтләр өткүзиду. Арқидинла у словакийә вә кродийә қатарлиқ җумһурийәтләрни зиярәт қилиду.

Шаңхәй гуруһиға әза дөләтләр башлиқлириниң бу қетимқи йиғинида бихәтәрлик мәсилилиридин башқа йәнә дуняви иқтисадий кризис вә өзара иқтисадий һәм малийә һәмкарлиқлирини ашуруш қатарлиқлардин башқа йәнә шималий корийә ядро мәсилиси һәмдә оттура асия вә афғанистан, иран мәсилилириниңму муһим тема болуп қелиши пәрәз қилинмақта.

Хитай тәрәп шаңхәй һәмкарлиқи тәсис қилинғандин буян изчил түрдә русийә вә башқа оттура асия дөләтлири билән бирлишип, уйғурларниң сиясий һәрикәтлиригә зәрбә беришни муһим вәзипиләр қатариға қойған иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт