Shangxey hemkarliq teshkilatigha eza döletler rehberliri rusiyide uchrishidu

15 - Iyun küni rusiye, xitay, qazaqistan, qirghizistan, özbékistan we tajikistandin ibaret shangxey hemkarliq teshkilatigha eza döletlirining aliy rehberlirining 9 - qétimliq yighini rusiyining yékatirinaburg shehiride ötküzülidu.
Muxbirimiz ümidwar
2009-06-14
Share

Shangxey guruhidiki 6 dölet bashliqlirining bu qétimqi yighinida " shangxey hemkarliq teshkilatigha eza döletlirining inaq qoshnidarchiliq, dostluq shertnamisi" emeliyleshtürülüsh bilen bir waqitta yene ular arisidiki herbiy, siyasiy, iqtisadiy, muqimliqni qoghdash, maliye we bashqa her sahege a'it mesililer heqqide pikir almashturulush arqiliq, mezkur teshkilatni téximu kücheytish heqqide yéngi teklipler muzakire qilinishi mumkin iken.

Rusiye agéntliqlirining yézishiche, buning aldida yene musteqil döletler hemdostluqi ellirining bixeterlikni qoghdash mesililirige a'it yighini ötküzülgen idi. Xitayning shinxu'a agéntliqining xewer qilishiche, xitay re'isi xu jintaw 14 - iyun küni yékatirinaburg shehiride yétip kelgen, uni rusiye mu'awin tashqi ishlar ministiri kütüwalghan.

Xu jintaw shangxey guruhining yighinidin kéyin 16 - iyun küni rusiye, xitay, braziliye we hindistan rehberlirining birleshme yighinigha ishtirak qilip, mezkur töt dölet arisidiki hemkarliqlarni muzakire qilidiken we 18 - iyun künigiche rusiyini resmiy ziyaret qilip, rusiye prézidénti dmitriy médwédéw, bash ministir wiladimir putin qatarliqlar bilen körüshüp, rusiye - xitay istratégiyilik shériklik munasiwetliri heqqide söhbetler ötküzidu. Arqidinla u slowakiye we krodiye qatarliq jumhuriyetlerni ziyaret qilidu.

Shangxey guruhigha eza döletler bashliqlirining bu qétimqi yighinida bixeterlik mesililiridin bashqa yene dunyawi iqtisadiy krizis we özara iqtisadiy hem maliye hemkarliqlirini ashurush qatarliqlardin bashqa yene shimaliy koriye yadro mesilisi hemde ottura asiya we afghanistan, iran mesililiriningmu muhim téma bolup qélishi perez qilinmaqta.

Xitay terep shangxey hemkarliqi tesis qilin'ghandin buyan izchil türde rusiye we bashqa ottura asiya döletliri bilen birliship, Uyghurlarning siyasiy heriketlirige zerbe bérishni muhim wezipiler qatarigha qoyghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet