'Shinjang bingtüeni'din dem élishqa chiqip yurtigha qaytqan shangxeylik xitaylar namayish qilghan
Muxbirimiz erkin
2009.11.27
2009.11.27
Weqedin xewerdar kishilerning radi'omizgha ashkarilishiche, 1950 - we 60 - yillarda Uyghur iligha chiqip bingtüende ishligen texminen 1000 gha yéqin shangxeylik xitay, shangxey sheherlik hökümetning erziyet ishxanisi aldigha yighilip, "inqilabi naxshilar"ni éytqan.
Weqedin xewerdar kishiler, bingtüenlik xitaylarning pinsiye puli we dawalash heqqini östürüp bérishni telep qilip shu'ar towlighanliqini, da'irilerning on nechche saqchi aptomobili ajratqanliqini, lékin namayishchilargha chéqilmighanliqini bildürdi. Weqedin xewerdar kishilerning radi'omizgha éytishigha qarighanda, bingtüenlik bu xitaylar 50 - 60 - yillarda "döletning chaqiriqigha awaz qoshup, chégra rayonni güllendürüshke barghanlar" iken.
Ular hazirqi pinsiye ma'ashining "shinjangdiki turmush sewiyisini ölchem qilidighanliqi, bu shangxeyning ma'ash sewiyisige yetmeydighanliqi"ni, da'irilerning ma'ashini östürüp bérishini telep qilidiken.
Weqedin xewerdar kishiler, 60 - 70 yashlardiki bu erzidarlarning chet'ellik muxbirlargha yéqin yolimaydighanliqini, bashqa erzidarlar bilen alaqe qilmaydighanliqini bildürmekte. "Shinjang ishlepchiqirish - qurulush bingtüeni 1950 - yillarda qurulghan yérim herbiy, yérim ishlepchiqirish bilen shughullinidighan bir organ bolup, mezkur organ Uyghur ilidiki gomindang qalduqlirini we ichkirilik palandilarni asas qilip qurulghan idi.