Shimaliy koriye jenubiy koriyige hujum qilip ikki eskerni öltürdi

Hujumda yene 3 neper puqra ölgen we etraptiki ahalilerning on nechche qoro -jayigha ot ketken. Roytirésning bügünki xewiride bildürüshiche, bu hujum 1953 ‏-yili shimaly koriye bilen jenubiy koriye arisida urush toxtitish kélishimi tüzülgendin kéyinki eng qattiq hujum hésablinidu. Közetküchilerning bayan qilishiche, gerche ikki terep arisida yérim esrdin artuq waqittin béri urush toxtitish kélishimi ijra qiliniwatqan bolsimu, emma ikki terep arisidiki urush keypiyati héchqachan peseygen emes؛ téxi birqanche ayning aldida jenubiy koriyining bir déngiz armiye paraxoti shimaliy koriye teripidin chöktürüwitilgen we 46 esker ölgen؛ buning bilen koriye arili weziyiti yene bir qétim jiddiylishken؛ emma u qétimda shimaliy koriye weqeni özlirining peyda qilghanliqini inkar qilghan idi.

Nöwette, jenubiy koriyide 28 ming amérika eskiri mewjut؛ bügün aqsaray bayanatchisi shimaliy koriyining mezkur hujumini eyiblep, shimaliy koriyini zorwanliqni toxtitishqa chaqirdi we amérikining jenubiy koriyini qoghdash wedisini tekrarlap ötti.

 Xitay tashqi ishlar bayanatchisi bolsa, tereplerni rayonning tinchliqi üchün pidakarliq kürsitishke chaqirish bilen bille, alte terep söhbitini téz bashlash kéreklikini bildürdi. Közetküchiler xitayning weqege terepsiz pozitsiye bildürüshke tirishiwatqanliqini, emeliyette bolsa, shimaliy koriyining, yuqiriqidek zorawanliq heriketliride asasliqi xitayning qollashliridin jasaret éliwatqanliqini otturigha qoymaqta.