Шветсийә ' бабур җасуслуқ вәқәси' гә четишлиқ хитай дипломатини чигридин қоғлап чиқарған

Шветсиийә ташқий ишлар министирлиқи дүшәнбә күни шветсийә бихәтәрлик даирилири тәрипидин йеқинда қолға елинған "бабур җасуслуқ вәқәси" гә четишлиқ бир хитай дипломатниң чегридин қоғлап чиқирилғанлиқини елан қилди.
Мухбиримиз әркин
2009-06-22
Share

Шветсийә мәтбуатлири стокһолимдики бу хитай дипломатниң шветсийә тәвәликидики уйғур бабур мәхсутниң хитайға җасуслуқ қилиш вәқәси билән мунасивәтлик икәнликини, шветсийә бихәтәрлик оргини бабурни қолға елип узун өтмәй бу дипломатниң салаһийитигә уйғун болмиған һәрикәтләрни елип барғанлиқи сәвәби чегридин қоғлап чиқирилғанлиқини билдүргән.

Хитай дипломати чегридин қоғлап чиқирилип узун өтмәй, хитай һөкүмити бейҗиңдики шветсийә әлчиханисиниң бир дипломатини чегридин қоғлап чиқарған. Лекин һәр икки дөләт чегридин қоғлап чиқирилған дипломатларниң исмини елан қилмиди. Шветсийә һөкүмити чегридин қоғлап чиқирилған бу дипломатниң мәлум бир дөләт әлчиханисиниң хадими икәнликини илгири сүрди.

Шветсийә ташқи ишлар министирлиқиниң баянатчиси андерс җөрле мундақ дәйду: "бир чәтәллик дипломатниң қоғлап чиқирилғанлиқини муәййәнләштүримиз. Лекин мән бу дипломатниң қайси дөләттин кәлгәнликигә баһа бәрмәймән. Биз йәнә буниңға җавабән бир шветсийә дипломатиниң чегридин қоғлап чиқирилғанлиқини елан қилимиз."

Шветсийә ахбарат агентлиқи TT болса чегридин қоғлап чиқириш вәқәсиниң 4 ‏- июн күни қолға елинған җасус гумандари бабур мәхсут билән мунасивәтлик икәнликини билдүргән.

Бу йил 61 яшлардики бабур мәхсут ләнҗуда туғулған болуп, 1980 ‏- йиллири хотәндә яшиған. 1990 ‏- Йилларниң ахири шветсийигә келип сиясий панаһлиқ тилигән. 20002 ‏- Йили шветсийә вәтәндашлиқиға өткән иди. У, 6 ‏- айниң 4 ‏- күни хитай әлчиханисиниң чегридин қоғлап чиқирилған дипломатиға ахбарат бериватқанда, шветсийә бихәтәрлик даирилири тәрипидин қолға елинған иди.


Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт