Сүрийә баш министири һөкүмитидин йүз өрүп исянчилар сепиға қошулди

Рияд һиҗаб буниңдин икки ай аввал президент башар әсәд тәрипидин баш министирлиққа тәйинләнгән иди. Рияд һиҗаб сүрийидә қозғилаң башланған 2011-йили 3-айдин буян, президент башар әсәдтин йүз өрүп инқилабчилар тәрәпкә өткән әң юқири дәриҗилик һөкүмәт әмәлдари. Көзәткүчиләр, рияд һиҗабниң йүз өрүши башар әсәд һөкүмитиниң ички қисимдин парчилинишқа башлиғанлиқини көрситиду, дәп қаримақта.

Бирақ, сүрийә дөләт телевизийә истансиси һиҗабниң вәзиписидин елип ташланғанлиқини хәвәр қилған. Хәвәрләрдә илгири сүрүшичә, рияд һиҗап аилисини елип иорданийигә қечип барған. Униң баянатчиси муһәммәт әләтри, әлҗәзирә телевизийә қанилиға бәргән баянатида рияд һиҗабниң бихәтәр бир җайда икәнликини билдүргән.

Рияд һиҗап, муһәммәт әләтри арқилиқ елан қилған баянатида әскәртип: бүгүн мән сүрийә һөкүмити әркинлик вә иззәт-һөрмәткә сазавәр болушни тәләп қилған қоралсиз хәлққә қарита ирқий қирғинчилиқ вә шәпқәтсиз қәтлиам елип бериватқан еғир пәйттә, террорчи, қатил һакимийәттин айрилип, муқәддәс инқилаб сепигә қошулғанлиқимни җакарлаймән, дегән.

Йәнә бәзи толуқсиз мәлуматларда әсәд һөкүмитиниң икки кабенит министириниң қечип кәткәнлики, малийә министири муһәммәт җалилатиниңму қачмақчи болуп тутулуп қалғанлиқи илгири сүрүлгән. Бирақ бу хәвәрниң растлиқи һазирға қәдәр испатланмиған. Сүрийә дөләт телевизийә қанили җалилатиниң қечип кәткәнликини рәт қилип, униң һазирму вәзипә атқуруватқанлиқини билдүргән.