Süriye bash ministiri hökümitidin yüz örüp isyanchilar sépigha qoshuldi

Süriye bash ministiri riyad hijabning bayanatchisining ashkarilishiche, süriyining mezkur bash ministiri bashar es'ed hökümitidin yüz örüp inqilab sépige qoshulghan.

Muxbirimiz erkin
2012-08-06

Riyad hijab buningdin ikki ay awwal prézidént bashar es'ed teripidin bash ministirliqqa teyinlen'gen idi. Riyad hijab süriyide qozghilang bashlan'ghan 2011-yili 3-aydin buyan, prézidént bashar esedtin yüz örüp inqilabchilar terepke ötken eng yuqiri derijilik hökümet emeldari. Közetküchiler, riyad hijabning yüz örüshi bashar es'ed hökümitining ichki qisimdin parchilinishqa bashlighanliqini körsitidu, dep qarimaqta.

Biraq, süriye dölet téléwiziye istansisi hijabning wezipisidin élip tashlan'ghanliqini xewer qilghan. Xewerlerde ilgiri sürüshiche, riyad hijap a'ilisini élip i'ordaniyige qéchip barghan. Uning bayanatchisi muhemmet el'etri, eljezire téléwiziye qaniligha bergen bayanatida riyad hijabning bixeter bir jayda ikenlikini bildürgen.

Riyad hijap, muhemmet el'etri arqiliq élan qilghan bayanatida eskertip: bügün men süriye hökümiti erkinlik we izzet-hörmetke sazawer bolushni telep qilghan qoralsiz xelqqe qarita irqiy qirghinchiliq we shepqetsiz qetli'am élip bériwatqan éghir peytte, térrorchi, qatil hakimiyettin ayrilip, muqeddes inqilab sépige qoshulghanliqimni jakarlaymen, dégen.

Yene bezi toluqsiz melumatlarda esed hökümitining ikki kabénit ministirining qéchip ketkenliki, maliye ministiri muhemmet jalilatiningmu qachmaqchi bolup tutulup qalghanliqi ilgiri sürülgen. Biraq bu xewerning rastliqi hazirgha qeder ispatlanmighan. Süriye dölet téléwiziye qanili jalilatining qéchip ketkenlikini ret qilip, uning hazirmu wezipe atquruwatqanliqini bildürgen.