Obama süriyining namayishchilarni basturghanliqini eyiblidi

Jüme küni süriye saqchi da'iriliri süriyining xoms shehiri we demeshiq shehiri yénidiki izra'a dégen jaylardiki jinaza namizigha qatnashqan öktichilerge oq chiqirip, köp sanda ademni öltürgendin kéyin, amérika prézidénti obama süriye hökümitini eyiblidi.
Muxbirimiz ümidwar
2011.04.24

U sözide süriye prézidénti basher assadning süriye xelqining erkinlik xitablirigha qulaq salmay, eksiche basturush yoli tutqanliqini körsetti. Amérika awazining xewer qilishiche, obama assadning iranni süriye puqralirini wehshiylik bilen basturushqa yardemlishishke chaqirghanliqini eyiblidi.

Jüme küni süriyide yüz bergen öktichilerni qanliq basturush qilmishigha nisbeten b d t bash sékrétari ban kimonmu awaz qoshup, süriye hökümitini tenqid qilghan hemde basturushni toxtitishni telep qilghan.

Jüme künidiki basturushta ölgenlerning sani heqqide her xil uchurlar bar. Rusiyining néwsru uchur torining yézishiche, süriye hökümet terep 18 ademning ölgenlikini bildürgen, biraq öktichiler 70 tin 112 ghiche ademning öltürülgenlikini melum qilghan.

Amérika awazining xewer qilishiche, yene shenbe künimu jinaza namizi pa'aliyitige qatnashqanlargha oq chiqirilip, az dégende 12 adem öltürülgenliki éytilghan.

Birleshme agéntliqining xewer qilishiche, yekshenbe küni süriyining bir qisim jaylirida namayish yüz bérip, köp sanda adem tutqun qilin'ghan.

Kishilik hoquqni közitish teshkilati bayanat élan qilip, birleshken döletler teshkilatini süriyidiki öktichilerni basturush qilmishlirini tekshürüshke chaqirghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.