Tajikistan prézidénti moskwadiki yighin'gha bérishtin tuyuqsiz yaltaydi

Perghane agéntliqining xewer qilishiche, eslide imam eli raxman yekshenbe küni kéche moskwagha qarap uchushi hemde düshenbe küni rusiye prézidénti démitriy médwédéw bilen körüshüp, ikki dölet munasiwetliri heqqide söhbet ötküzmekchi idi.

Prézidént imam eli raxmanning tuyuqsiz türde rusiyige qaratqan ziyaritini bikar qilishi her xil perezlerni otturigha chiqardi 31 - yanwar küni bu xewerni élan qilghan tajikistan tashqi ishlar ministirlikining bayanatchisi dölet naziri buning sewebi heqqide toxtilip, " imam eli raxman énérgiye krizisi keltürüp chiqarghan murekkep weziyet tüpeylidin tajikistandin ayrilmaydu. Uning féwral éyining deslepki on künidiki barliq ziyaret pilanliri emeldin qalduruldi" dep chüshenche bergen.

Rusiyining intérfakis agéntliqining xewer qilishiche, biraq, imam eli raxman rusiye ziyaritini emeldin qaldurghan bilen, eslide moskwadiki ziyaritini axirlashturup bolup, baltiq jumhuriyetlirige seper qilmaqchi idi. 10 - 11 - Féwral künliri bolsa, béryusélgha bérip, yawropa komitétining yighinigha ishtirak qilishi kérek.

Biraq, 1992 - yilidin buyan rusiye bilen qoyuq munasiwette bolup kéliwatqan, musteqil döletler hemdostluqi, kolléktip bixeterlik teshkilati, shangxey hemkarliqi we yawro - asiya iqtisadi ittipaqi qatarliq barliq teshkilatlarning yighinigha bir qétimmu qaldurmay qatnishiwatqan imam eli raxmanning bu herikiti tajikistan bilen rusiye arisidiki ixtilapliq mesililerning köpeygenlikige taqishiwatqanliqidin dérek bérishi mumkin iken.

Bu qétim moskwagha nazarbayéw, baqiyéw, kerimof qatarliq ottura asiya rehberlirining hemmisi kélidu.