Тарим ойманлиқида йәнә йеңидин зор миқдарда тәбиий газ записи байқалди

Хитай тарим ойманлиқидики тәбиий газ запас миқдариниң бир тирилйон куб метирдин артуқ икәнликини елан қилди. Бу һәқтә хитайниң шинхуа хәвәр тори хәвәр тарқатқан болуп, хәвәрдә хитай бойичә әң чоң тәбиий газлиқ һесаблинидиған тарим нефитлиқидики мәзкур зор миқдардики тәбиий газ записи арқилиқ "ғәрбниң гезини шәрққә тошуш қурулуши" ни 30 йилғичә муқим тәбиий газ билән тәминләшкә болидиғанлиқи муәййәнләштүрүлгән.
Мухбиримиз үмүдвар
2010-02-14
Елхәт
Пикир
Share
Принт

Хитай һөкүмити 2004 - йили, тарим вадисидики тәбиий газларни хитайниң ичкири өлкилирини, болупму деңиз бойидики шәһәрләрни тәминләшни мәқсәт қилидиған "ғәрбниң гезини шәрққә тошуш" туруба қурулушини рәсмий ишқа кириштүрүп, 5 йилдин буян таримниң тәбиий газлири билән хитайниң шәрқиғә җайлашқан 14 өлкидики 80 нәччә шәһәр хәлқини тәминләватқан болуп, тарим тәбиий газлири билән тәминлиниватқан аһалиниң омумий сани 300 милйонға йетидикән.

Хәвәрдә ейтилишичә, бәш йилдин буян тарим ойманлиқидин мәзкур газ турубиси арқилиқ 60 милярд кубметир тәбиий газ ичкиригә тошулуп, хитай бойичә тәбиий газ қезишта биринчи орунни игилигән. Хитай мәркизий һөкүмити йәнә, уйғур елиниң көмүр вә нефит запаслирини ичкиригә тошуйдиған "ғәрб - шәрқ тошуш қурулуш"лирини тәсис қилған болуп, техи йеқиндила қумулдики көмүр канлиридин 2009 - йилида ичкиригә тошуп кетилгән көмүр миқдари елан қилинған иди.

Бейҗиң һөкүмити нефит вә тәбиий газ миқдари әң көп һесаблинидиған тарим ойманлиқиниң әтрапидики уйғурлар зич олтурақлашқан наһийиләрни хитай бойичә әң кәмбәғәл наһийиләр тизимликигә киргүзгән болуп, бу җайлардики уйғурларни асас қилған йеза вә шәһәр пуқралириниң йиллиқ оттуричә кирими хитай бойичә әң арқидин санилидиғанлар һесаблиниду.

Пикирләр (0)
Share
Толуқ бәт