Iraqning sabiq tashqi ishlar ministiri tariq eziz ölümge höküm qilindi

Iraq soti tariq eziz üstidin 2009 ‏- yili mart éyida bir qétim höküm élan qilghan bolup, u chaghda, 42 neper tijaretchining öltürülüsh weqesige chétilip, 15 yilliq qamaq jazasi bérilgen. Aridin 5 ay ötkende, iraqtiki kürtlarning yurtidin heydilishide rol oynighan dep eyiblinip, üstilep 7 yilliq qamaq jazasi bérilgen.

Bu nöwet bolsa, iraqtiki shi'elerning basturulishida jawabkarliqi bar dep qarilip ölüm jazasi bérilgen. Tariq ezizning adwokati tünügün mezkür hökümni siyasiy héssiyatning tesiride chiqirilghan höküm dep naraziliq bildürgen. U yene hökümge qarshi naraziliq erzi sunush - sunmasliq heqqide téxi bir qarargha kelmigenlikini bildürgen. Tariq ezizning ereb birleshme xelipilikide yashawatqan oghli dadisining hichqandaq eskiriy wezipe ötimigenlikini otturigha qoyup dadisigha bérilgen jazaning heqsiz ikenlikini bildürgen.

Tariq eziz 2003 - yili amérika eskerliri teripidin tutulghan. U yéqinda en'gliyining gu'ardiyan gézitining ziyaritini qobul qilghan chéghida sadam hüseyin üstidiki eyiblimilerning hemmisini ret qilghan we "tarix sadamning öz wetini üchün xizmet qilghanliqini axiri ispatlaydu" dégen. U yene amérika prézidénti obamaning iraqtin esker chékindürüsh qararini, iraqni börilerning changgiligha tashlap qoyup chiqip kétish dep eyibligen.