«Таймиз» гезити: хәйвудниң өлүми компартийә ичидики һоқуқ көрүши билән мунасивәтлик

Әнглийә «таймиз» гезити хәвәр елан қилип, әнглийилик содигәр хәйвудниң өлүми хитай компартийиси юқири қатлимидики һоқуқ көрүши билән мунасивәтлик икәнликини илгири сүрди. Әнглийилик содигәр хәйвудниң сабиқ чуңчиң шәһәрлик партком секретари, компартийә сиясий бюро әзаси бө шиләй билән йеқин ағинидарчилиқ мунасивити барлиқи қәйт қилинған иди.
Мухбиримиз әркин
2012-03-30
Елхәт
Пикир
Share
Принт

Хәйвуд өткән йили 11‏-айда чоңчидики бир меһманханида туюқсиз өлгән. Сақчи тәрәп илгири униңға «һарақни көп ичиветип өлгән» дәп диагноз қоюп, униң җәситини дәрһал көйдүрүвәткән иди. Бирақ йеқинда бө шиләй һоқуқидин ағдурулғандин кейин, униң суйиқәсткә учриған болуши мумкинлики оттуриға қоюлған.

Әнглийә һөкүмити униң өлүш сәвәби чуңчиң сақчи даирилири чүшәндүргәндәк ундақ болмаслиқи мумкинликини елан қилған. Безиләр униң билән бө шиләйниң аяли арисида ихтилап йүз берип, өлтүрүлгәнликини илгири сүргән иди.

Лекин «таймиз» гезитидә бүгүн елан қилинған хәвәрдә илгири сүрүлүшичә, бир әнглийә һөкүмәт әмәлдари хәйвудниң өлүми йеқинда ағдурулған чуңчиң партком секретари бө шиләй билән алақидар икәнликини ашкарилиған.

Хәвәрдә йәнә, чуңчиң шәһәрлик җ х идарисиниң башлиқи ваң лиҗүн бу 2‏-айниң башлири америка консулханисиға кириштин сәл бурун, әнглийиниң чоңчидики консулханисиға телефон қилип, улардин көрүшүшни тәләп қилғанлиқини билдүргән. Хәвәрдә әскәртилишичә, хәйвудниң өлүм сәвәби бө шиләй билән ваң лиҗүнниң мунасивитиниң бузулушиға сәвәб болған амилларниң бири болуши мумкин.

Пикирләр (0)
Share
Толуқ бәт