Тибәтлик яшниң өлүми “тез тәрәққий қиливатқан 5 дөләт йиғини” ға көләңгә чүшүрди

Русийә, хитай, бразилийә, җәнубий африқа вә һиндистандин ибарәт 5 дөләт башлиқи қатнашқан бу йиғин тибәтлик намайишчиларниң хитай һөкүмитигә қарши елип барған намайишлириниң көләңгиси астида елип берилмақта.

Дүшәнбә күни 27 яшлиқ бир тибәт яш йеңи деһли кочилирида өзигә от қоюп хитай һөкүмитигә қарши шоар товлиған иди. Еғир яриланған бу яш дохтурханиға елип берилған болсиму, әмма униң көйүк яриси еғир болғанлиқтин қутқузуш үнүм бәрмәй чаршәнбә күни дохтурханида җан үзгән.

Франсийә агентлиқиниң хәвәр қилишичә, бу яш өзигә от қоюштин илгири бир парчә хәт тәйярлап қойған. Хәттә у өзини һазирғичә өзигә от қоюп өлгән 29-тибәт дәп язған вә дуня җамаәтчиликини тибәтләргә көңүл бөлүшкә, хитай һөкүмитини тибәтләргә қиливатқан зулумни аяғлаштурушқа чақирған.

Мәзкур вәқә йүз бәргәндин кейин 80 миң әтрапида тибәтликкә баш панаһлиқ қиливатқан қиливатқан һиндистанниң сақчи даирилири хитай рәһбәр ху җинтавниң бихәтәрликигә капаләтлик қилиш үчүн бихәтәрлик тәдбирлирини қаттиқ күчәйткәнниң сиртида, бирқанчә йүз тибәтликни қолға алған. Игилинишичә, улар ху җинтав һиндистандин айрилғандин кейин андин қоюп берилидикән.