Шәрқий тибәтниң чамдо районидики бир һөкүмәт бинасида партлаш йүз бәрди

Радиомиз тибәт бөлүминиң тибәт сәргәрдан парламент әзасиниң сөзидин нәқил кәлтүрүп хәвәр қилишичә, чамдодики хитай һөкүмәт бинасида йүз бәргән партлаш чаршәнбә күни рой бәргән.

Исмини ашкарилашни халимайдиған мәзкур парламент әзаси вәқәдә “адәм чиқим болғанлиқиға даир мәлумат йоқлуқи”, чүнки партлашниң “бинада адәм қалмиған кечидә йүз бәргәнлики” ни билдүргән.

Мәзкур вәқә хитай ахбарат васитилиридә хәвәр қилинмиған. Чамдодики йәрлик сақчи даирилири мухбирларниң бу һәқтики соаллирини җавабсиз қалдуруп, “партлаш авази аңлап бақмиғанлиқи” билдүргән. Әгәр партлаш вәқәси раст болса, вәқәниң кимләр тәрипидин, қандақ муддиа билән елип берилғанлиқи мунасивәтлик тәрәпләрни қизиқтуридиған бир мәсилә болуп қалиду.

Тибәт сәргәрдан парламентиниң исмини ашкарилашни халимайдиған парламент әзаси йәнә, партлаш йүз бәргән бинаниң “темиға қизил рәңдә тибәт мустәқиллиқиға чақиридиған шоар йезилғанлиқи, тәшвиқат вәрәқилириниң тарқитилғанлиқи” ни билдүргән.

Көзәткүчиләр әгәр бу вәқәниң растлиқи испатланса, буниң йеқиндин буян бәзи тибәт раһиблириниң өзини көйдүрүп, хитай даирилиригә наразилиқ билдүрүш сәвәбидин җиддийлишип кәткән тибәт-хитай мунасивитини илгириләп җиддийләштүрүветидиғанлиқини билдүрмәктә.