Tibet rahibliri özlirini köydürüshni dawamlashturmaqta

Bügün sichüenning genzi rayonida yene bir tibet rahibi özige ot qoyuwaldi. Buning bilen bu yil 3-aydin bashlap özige ot qoyush arqiliq xitay hökümitige bolghan naraziliqini ipadiligen tibet rahiblirining sani 10 gha yetti.

Muxbirimiz irade
2011-10-25

Tibet awazi téléwiziyisining xewer qilishiche, bu yil 39 yashqa kirgen rahib dawa séring kirti ibadetxanisining rahibi bolup, u bügün yerlik waqit etigen sa'et 9:30 lar etrapida özige ot qoyghan. Ehwalni körgüchiler uning ot ichide turup “Rohaniy dahiymiz dalay lama sürgündin qaytip kelsun, tibetler qaytidin jem bolsun” dep sho'ar towlighanliqini bildürgen.

Weqe yüz bergendin kéyin, etraptiki saqchilar kélip otni öchürüwalghan bolsimu, u doxturxanigha bérip dawalinishni ret qilip saqchilar bilen tirkeshken. Bedini xéli éghir derijide köyüp yarilan'ghan dawa séringning ehwalining xeterlik ikenliki xewer qilinmaqta.

Tibet rahiblirining bu paji'esi xelq'ara jama'etning diqqitini qozghimaqta. Aldinqi küni amérika hökümiti xitayni bu heqte agahlandurup, amérikining mesilige köngül bölidighanliqini bildürgen. Xitay hökümiti amérikining bu agahlandurushini xitayning ichki ishlirigha arilashqanliq, dep tenqid qilghan idi.