Tibet teshkilatliri xelq'arani tibetlerning özini köydürüsh herikitige diqqet qilishqa chaqirdi
2012.08.28
Daramsaladiki tibet uchur merkizining bayanatchisi sérinning bügün radi'omizgha bergen uchuridin melum bolushiche, abiy rayonida özige ot qoyuwalghan labsang we damchok isimlik bu ikki neper tibet rahibi doxturxanigha élip bérilghandin kéyin ölgen. Weqedin kéyin xitay da'iriliri abiy rayonida jiddiy tedbir qollinip, düshenbe küni kechte kirtiy ibadetxanisining bash rahibi we ikki neper yardemchi xadimini ibadetxanidiki wezipisidin qaldurghan. Da'iriler yene uchurni qamal qilip, abiy rayonining sirt bilen bolghan téléfon, intérnét alaqisini üzüwetken.
Melum bolushiche, xitay hökümitige qarshi naraziliqini ipadiligen tibetlerning özige ot qoyuwélish herikiti 2009-yildin buyan dawamlishiwatqan bolup, tibet yashlar qurultiyi bügünki bayanatida, 2012-yili 27-awghustqa qeder 51 neper tibetlikning özige ot qoyuwalghanliqini, bularning ichide peqet sichüenning abiy rayonidiki özige ot qoyuwalghan tibetlerningla 27 kishige yetkenlikini bildürdi.