Tibetlik bay ömürlük qamaq jazasigha höküm qilindi

Birleshme agéntliqining xewer qilishiche, bu yil 37 yashqa kirgen dorjé tashi isimlik bu kishi tibettiki dangliq baylarning biri bolup, u gensuda ösüp yétilgen, kéyin u igilik tiklep tibettiki réstoran, köngül échish, sayahet, méhmanxana we öy - mülük saheliride tijaret qilidighan chong baylarning birige aylan'ghan. U ilgiri köp qétim xitay kompartiyisi teripidin "memliket boyiche munewwer yash" bolup bahalinip, radi'o - téliwiziyilerde tonushturulghan iken.

Igilinishiche, u yene tibet xelq hökümiti tor bétide "qarliq choqqidiki qehriman bürküt" dep teriplen'gen iken. Emma b b s ning xewer qilishiche, muxbir bügün u maqalini izdiginide, uning öchürüwétilgenlikini bayqighan.

Hindistandiki tibet kishilik hoquq we démokratiye merkizining bashliqi érjin ténzinning bildürüshiche, dorji tashi 2008 - yili 3 - ayda lxasada yüz bergen weqedin nechche ay kéyin xitay da'iriliri teripidin qolgha élinip ketken we bu yil 6 - ayning 26 - küni uninggha üch künlük yépiq sot échilghan. Sotta uninggha "chet'eldiki sürgündiki hökümetke yardem bérish" deydighan jinayet békitilip ömürlük qamaqqa höküm qilin'ghan.

Kolumbiye uniwérsitétidiki tibet ishliri mutexessisi robbiy barnét birleshme agéntliqigha qilghan sözide " bu kishining tibette hörmetke sazawer biri ikenlikini, emma uning chet'eldiki teshkilatlar bilen alaqisining yoqluqini bildürgen. Kishilik hoquq teshkilatliri bolsa, xitay da'irilirining yéqindin buyan tibette közge körün'gen kishilerni köplep qolgha éliwatqanliqini, qabiliyetlik kishiler üstidiki bésimni ashurush arqiliq, tibetni bashqurush meqsitige yetmekchi boluwatqanliqini bildürdi.

• Print
• Hembehr
• Ewetish

Barliq pikir - bayanlarni körüsh.

• Bügünki anglitish
• Ilgiriki anglitishlar