Xitay tor buzarliri amérika soda jem'iyitining tor békitige hujum qilip kirip, nurghun uchurni oghrilap ketken

Xitay tor buzarlirining amérika soda jem'iyiti tor békitining mudapi'e sistémisini buzup ötüp, uning tor meshghulati we 3 milyon ezasigha a'it uchurigha érishkenliki bildürüldi.
Muxbirimiz erkin
2011.12.21

Biraq, béyjing hökümiti tor hujumini xitayning élip barghanliqini ret qilghan. Amérika “Wal stérit zhurnal” gézitining xewer qilishiche, tor békitige hujum qilish herikitige az dégende 300 tor adrésining qatnashqanliqi bayqalghan.

Bu weqe 2010‏-yili 5‏-ayda yüz bergen bolup, tor békiti derhal taqalghan. Mezkur jem'iyetning néme üchün bu weqeni öz waqtida ashkarilimay, emdi élan qilghanliqi melum emes. Amérika soda jem'iyiti amérikining eng chong soda uyushmisidur. “Wal stérit zhurnal géziti” ning xewiride tor buzarlarning zadi qanchilik uchurni körüshke muweppeq bolalighanliqi namelum déyilgen.

Lékin, bu xitayning tunji qétim amérika tor béketlirige hujum qilip, hökümet, karxana we shexske a'it uchurlarni oghrilash bilen eyiblinishi emes. Xewerde ilgiri sürüshiche, weqedin xewerdar kishiler amérika, tor hujumining arqisida xitay hökümiti bar dep guman qilidighanliqini bildürgen.

Lékin, xitay tashqi ishlar ministirliqi bayanatchisi lyu wéymin tor hujumida xitay hökümitining qoli barliqini ret qilip, “Bundaq asassiz toqup chiqirilghan atalmish tor hujumigha bir néme déyishke erzimeydu. Junggo qanuni tor buzarliqni chekleydu” dégen. Biraq, amérika soda uyushmisining mes'ul xadimliri hujumning nahayiti etrapliq orunlashturulghan, qarshi terepni yaxshi bilidighan, konkrét shexslerni nishan qilghan, ilghar qorallarni qollan'ghan, axbarat toplashni meqset qilip élip bérilghanliqini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.