Dawud'oghlu: türkiye - xitay munasiwitining tereqqiyati tarixning bizni Uyghurlardin ayriwetken nuqtisida qayta birleshtürüdu

Türkiye tashqi ishlar ministiri dawud'oghlu tünügün qeshqerni ziyaret qilip, xitay - türkiye munasiwitining tereqqiyati Uyghurlarning türkiye bilen bolghan munasiwitini kücheytishke paydiliq ikenlikini ilgiri sürgen.
Muxbirimiz erkin
2010-10-29
Share

Türkiye metbu'atlirining jüme küni mezkur ziyaret heqqide bergen xewerliridin melum bolushiche, dawud'oghlu qeshqerde bu qétimqi ziyaritining ehmiyitini tekitlep, "ikki dölet arisidiki munasiwetning tereqqi qilishi Uyghur qérindashlirimizni rahetlendürüdu. Bizning ular bilen erkin quchaqlishishimizni, tarixning bizni ayriwetken nuqtisidin qayta birlishishimizni temin étidu" dégen.

Jüme küni türkiyidiki eng chong gézitlerdin biri bolghan "milliyet " gézitining ston yazghuchiliridin sami kohén dawud'oghluning qeshqer ziyariti heqqide maqale élan qilip, uning bu ziyaret arqiliq bir tereptin Uyghur türklirining xatirjem yashishigha yardemchi bolup, ular bilen bolghan tarixiy we medeniyet rishtisini dawamlashturudighanliqi, yene bir tereptin xitay hökümitige junggoning zémin pütünlükige hörmet qilip, Uyghur élining xitaydin ayrilishini qollimaydighanliqi, lékin Uyghurlarning xatirjem yashishigha ehmiyet béridighanliqini yetküzmekchi bolghanliqini bildürdi.

Türkiye 2009‏ - yili yüz bergen "5‏ - iyul weqesi"ge nahayiti qattiq inkas qayturup, xitayni Uyghurlargha "irqiy qirghinchiliq" élip bérish bilen eyibligen idi. Sami kohénning eskertishiche, weqedin kéyin türkiye hökümiti xitay - türkiye munasiwetlirini qayta közdin kechürüsh arqiliq "shinjang weqesi"ge tutqan pozitsiyisi we uslubini özgertken. Sami kohén, türk hökümitining xitaydin ibaret türkiye tashqi siyasitide muhim orun tutidighan bir dölet bilen bolghan munasiwetni közdin saqit qilalmaydighanliqini, Uyghur türklirining ehwalini özgertishke peqet xitay bilen yéqin munasiwet qurush arqiliqla yardem qilalaydighanliqini tonup yetken, deydu.

Dawud'oghluning Uyghur élidiki ziyariti 2 kün dawam qilghan idi. U peyshenbe küni qeshqer ziyaritini axirlashturghandin kéyin ürümchige barghan we jüme küni ürümchi beytulla meschitide jama'et bilen jüme namizi oqughan hem jinaze namizigha qatnashqan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet