Ürümchidiki mekteplerde köchmenler nopusi %50 tin éship ketken

Ürümchi ma'arip idarisi, sheherlik j x idarisi hemde emgek we jem'iyet parawanliq organliri bu aqqunlar perzentlirining mektepke kirish ishlirini tertipke sélish üchün " ürümchidiki aqqun ishchilar perzentlirining oqush ishlirini bashqurush nizami " ni élan qilghan. Bu nizam kéler yili séntebirdin bashlap yolgha qoyulidiken.

Xewerdin melum bolushiche, 2005 - yilidin bashlap yéngi oqush mewsümide mektepke kirishke tizimlatqan oqughuchilar sani pewqul'adde éship kétiwatqan bolup, yillardin buyan bezi siniplarda oqughuchilar sani 60 tin éship parta ‏ - orunduq we sinip yétishmeslik kélip chiqqan.
Ma'arip orunlirining tekshürüp statistika qilishiche, mushu ikki yildila ürümchidiki mekteplerde aqqun ishchilarning perzentlirining sani 40 mingdin ashqan.

Nöwette ürümchidiki mekteplerde mejburiy ma'arip qobul qiliwatqan aqqun nopusi ürümchi sheher nopusidinmu halqip ketken. Shu seweblik esli yerlik nopustiki balilarning mektepke kirishi teske toxtaydighan ehwal kélip chiqqan.

Halbuki ürümchi da'iriliri yolgha qoymaqchi bolghan bashqurush nizamida aqqunlarning perzentlirining mekteplerge kirishige melum shertlerni hazirlishi kérekliki kirgüzülgen bolsimu, emma yenila qiyinchiliqi bar aqqunlarning perzentlirinimu bashqa balilargha oxshash oqush shara'itigha ige qilish,barliq oqush heqqi hemde qoshumche heqlerni bikar qilishqa oxshash siyasetlerni yolgha qoymaqchi iken.