Үрүмчи вәзийити қайтидин җиддийләшти

Үрүмчидә йәнә миңларчә хитай намайиш өткүзди. Даңлиқ хәвәр агентлиқлирида йәр алған хәвәрләрдин мәлум болушичә, чаршәнбә вә пәйшәнбә күнлири мәйданға кәлгән намайишта миңлиған хитайлар бир йәргә йиғилип йәрлик һөкүмәтниң үрүмчидә муқимлиқни бәрпа қилалмиғанлиқиға наразилиқ билдургән. Улар йәнә үрүмчи вәқәсиниң җавапкарлириниң қаттиқ җазалинишини тәләп қилған.
Мухбиримиз ирадә
2009.09.03

Бу қетимлиқ намайишта әң диққәт тартқан ноқта болса намайишчи хитайларниң бирдәк: "ваң лечуән тәхиттин чүшсун, бу һөкүмәт карға кәлмәйдиған һөкүмәт" дәп шуар товлиши болди. Әтигән саәт он әтрапида ғәрбий кичик қовуқ райониға йиғилған миңларчә намайишчи хитай шуар товлиғач һөкүмәт бинасиниң алдиға қарап маңған.

Ройтерс агентлиқиниң вәқә һәққидә бәргән хәвиридин мәлум болушичә, намайишчи хитайлар бу җәрянда алдиға йолуққан уйғурларни уруп яриландурған. Уларниң бәзилири дохтурханиларға елип берилған. Үрүмчи шәһиридики һәр қайси идарә - органлар вә мәктәпләрму дәрһал иш тохтатқан.

Мәлум болушичә, намайишниң асаслиқ сәвәблиридин йәнә бири болса 5 - июл урумчи вәқәсидин кейин үрүмчидә кишиләрниң окул йиңнисниң һуҗумиға учрап яридар болуш вәқәлириниң барлиққа келиши икән. Намайишчи хитайлар кочида кетиватқан кишиләргә окул йиңниси санчип яридар қиливатқан кишиләрниң уйғурлар икәнликини илгири сүргән болуп, һөкүмәттин бу кишиләрни қаттиқ җазалашни тәләп қилған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.