Хитай өлкилиригә алдап кетилгән 3000 дин артуқ уйғур балилири қайтуруп келинди

Нәччә он йиллардин буян, яман нийәтлик кишиләр тәрипидин хитай өлкилиригә алдап кетилгән, сетилғандин кейин бала җинайәтчиләргә айлиниватқан уйғур нарсидә бала һәм яш өсмүрләрниң барғанчә көпийиши уйғур җәмийитидики еғир мәсилә болуп кәлгән иди.
Мухбиримиз гүлчеһрә
2009.02.10

Дүшәнбә күни хитай хәвәр торидин ашкарилинишичә,, уйғур ели җамаәт хәвпсизлик даирилири 2006 - йилидин башлап 2008 - йилиниң ахириғичә хитай өлкилиригә алдап кетилип оғрилиқ, янчуқчилиқ вә башқа җинайәтләргә мәҗбурланған 3056 нәпәр яш өсмүрни қайтуруп кәлгән.

Адәм бедиклири, җинайәт гуруһлириниң қолидин қутулуп аилилиригә қайтқан бу балилар асасән қәшқәр, хотән вә ақсуниң намрат җайлиридин болуп, һәммиси дегидәк хитай өлкилиридә янчуқчилиқ, оғрилиққа охшаш җинайәтләргә мәҗбурланған вә бу җәрянда роһий, җисманий җәһәтләрдин интайин еғир хорланған, зиянкәшликләргә учриған.

Хәвәрләрдин ашкарилинишичә, 8 чоң адәм бедиклири гуруһи паш болған, 177 нәпәр җинайәтчи тутулған һәмдә йәнә гуруһлар тәрипидин түрлүк җинайәтләргә мәҗбурланған техи қорамиға йәтмигән яш өсмүрләрдин 746 нәпири аилилиригә қайтурулған.

Уйғур балилириниң хитай өлкилиригә алдинип, сетилип барғандин кейин җинайәтләргә мәҗбурлиниши һәмдә һәқ ‏ - һоқуқлириниң еғир дәпсәндә қилиниши йиллардин бери, әркин асия радиоси қатарлиқ хәлқара мәтбуатларда тәнқидлиниватқан шундақла хитайниң хәлқ вәкиллири қурултайлиридиму оттуриға қоюлуватқан болуп, һөкүмәт һәқ - һоқуқлири еғир дәхлигә учраватқан уйғур балилирини, вәйран болуватқан нәччә миңларчә аилиләрни қутқузушқа җиддий һәрикәт қилмиғанлиқтин, бир қанчә йил илгири, бир қисим уйғур зиялийлар өзликидин тәшкиллинип хитай өлкилиридә сәрсан болуватқан уйғур балилирини қутқузушқа һәрикәт қилған иди, мәзкур һәрикәткә қатнашқучиларниң билдүрүшичә, 1990 - йиллардин кейин хитайниң, шаңхәй, бейҗиң, гуаңҗу, шинҗин қатарлиқ чоң шәһәрлиригә алдинип берип җинайәтләргә мәҗбурланған уйғур балилириниң сани тәхминән 40 миңдин ашидикән.


Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.