Хитай, уйғур аптоном районида мәмури хадимларниң 'қош тиллиқ' болушини тәләп қилди

Йеқинда уйғур аптоном райони тәшкилат бөлүми вә кадирлар назарити һөҗҗәт чүшүрүп, буниңдин кейин мәмури хадимларниң "қош тил" өткилидин өтүши тәләп қилинидиғанлиқини елан қилған. Лекин бу һәқтики хәвәрләрдә"қош тил" өткилиниң уйғур мәмури хадимлириға қаритилғанлиқини яки бу өткәлниң хитай мәмури хадимлиридин тәләп қилинмайдиғанлиқини чүшәндүрмигән.
Мухбиримиз әркин
2010.04.30

Тәшкилат бөлүми вә кадирлар назаритиниң "йеңи қобул қилинған мәмури хадимларни қош тилда тәрбийиләш вә емтиһан елиш хизмити һәққидики уқтуруши"да, мәмури хадимларниң қош тил өткилини иҗра қилиши вә қелиплаштуруши тәкитлинип, йеңи қобул қилинған мәмури хадимларниң қош тил өткилидин өтүш емтиһани бир туташ орунлаштурулидиғанлиқини илгири сүргән.

Даириләр бу һәқтики һөҗҗәттә, мәмури хадимларниң қош тил өткилидин өтүп, лаяқәтлик гуваһнамиси алғандила хизмәткә чүшәләйдиғанлиқини, лаяқәтлик гуваһнамиси алалмиғанларға өгиниш пурсити берилидиғанлиқини тәкитлигән.

Мәтбуат хәвәрлиригә қариғанда, америка оттура америка университетиниң сабиқ профессори яң лийүй " җуңгониң шинҗаңда мәмури хадимларға қош тиллиқ түзүмни йүргүзүши бейҗиңниң шинҗаң сияситидә бир аз әқлини тепиватқанлиқиниң бишарити, лекин буни йәнә көзитишкә тоғра келиду" дегән.

Америка колорадо гиологийә университетиниң профессори елзабит давис ханим, бу сиясәтниң иҗра қилиниши "шу җайдики әмәлдарларниң тосқунлуқиға учраш еһтимали бар"лиқини билдүргән.


Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.