Март ейида уйғур елиниң шимали йәнә бир қетим шивирғанлиқ қар апитигә учриди

Хитайниң тәңритағ тор бетиниң хәвәр қилишичә, бу йил қиш пәслидә, ғәрбий сибирийиниң соғуқ һава еқиминиң тәсиридә, уйғур аптоном райониниң температуриси изчил төвән болуп, 60 йилдин буянқи әң еғир қар апити йүз берип еғир иқтисадий зиян болған.
Мухбиримиз миһрибан
2010-03-01
Share

Һава райи идарилириниң мәлуматида көрситилишичә, гәрчә 3 - ай киргән болсиму, 1 - марттин 4 - мартқичә болған мәзгилдә, уйғур аптоном райониниң шимали қисми үзлүксиз һалда шивирғанлиқ қар апитигә учрайдикән. Алтай районида әң төвән температура нөлдин төвән 35 градусқа чүшүши мумкин икән.

Бу икки күндин буян тәңритағниң шималидики районларда үзлүксиз һалда қелин қар яққан, или областиниң нилқа наһийисидики төмүр кан районида қар көчүп кан районидики 30 нәччә адәм һаятидин айрилған, 28 - феврал күни 29 адәм тик учар арқилиқ қутқузивелинған, райондики чарвичиларниң әһвали болса ениқ әмәс икән. 28 - Феврал күни йәнә үрүмчи - чөчәк йолидики шамал өтәң дәп атилидиған районда 9 балдин юқири боран чиқип, шивирғанлиқ қар апити йүз берип қатнаш линийиси етилип қалған.

Хәвәрләрдин мәлум болушичә, бу йил қиш пәслидә уйғур елидә қар апити еғир болған болуп, һазирғичә 31 наһийә, шәһәр апәткә учриған, һазирғичә биваситә иқтисадий зиян 640 милйон йүәнгә йәткән. Нөвәттә әтиязда йүз беридиған кәлкүн апитиниң йәниму еғир болуши мөлчәрләнмәктә икән.

Көзәткүчиләрниң қаришичә, әмма мушундақ еғир тәбиий апәт шараитидиму уйғур аптоном район даирилири "муқимлиқ һәммидин әла" тәшвиқатини күчәйтиватқан болуп, улар һазир пуқраларни апәттин қандақ қутқузуш әмәс, бәлки районниң муқимлиқини қандақ сақлаш ғемидә икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт