Uyghur élidiki bashlan'ghuch - ottura mekteplerde milletler ittipaqliqi terbiyisi kücheytilidu

Nöwette Uyghur élidiki ottura, bashlan'ghuch mektepler yéngi oqush mewsümini bashlash aldida turidu. Xitayning shinxu'a torining 17 - awghust xewiridin ashkarilinishiche, ürümchide 5 - iyul weqesi yüz bergendin kéyin ürümchi ma'arip tarmaqliri, mekteplerde her millet oqughuchilirigha milletler ittipaqliqini kücheytish üchün bu yéngi oqush mewsümidin bashlap bir qatar pa'aliyetlerni orunlashturushni pilan'gha kirgüzgen.
Muxbirimiz gülchéhre
2009-08-18
Share

Ürümchining Uyghurlar merkezlik olturaqlashqan tengritagh rayonluq ma'arip idarisi bu heqte 16 - awghust küni mexsus yighin chaqirip, rayondiki mekteplerde 1 - séntebir oqush bashlighandin bashlap, xitay we az sanliq baliliri qol tutushush pa'aliyiti, milletler ittipaqliqigha a'it bir jümle söz öginish herikiti, milletler ittipaqliqigha a'it bir hékaye éytish, milletler ara dostluq sowghisi bérish, her millet baliliri öz ‏ - ara quchaqlishish, xitay balilar bilen az sanliq millet baliliri öz ‏ - ara a'ilide méhman bolushqa oxshash pa'aliyetlerni élip bérishni belgiligen.

Shundaqla yene, ma'arip tarmaqliridin mexsus xadim belgilep oqush bashlighandin kéyin her bir oqughuchi hem ularning ata anisigha 5 - iyul ürümchi weqesining heqiqiy ehwalini choqum yetküzüsh, rabiye qadir we chet'ellerdiki milliy bölgünchilerning herikitini qattiq tenqidlesh bilen teng xitay kommunistik partiyisi hem hökümitining shinjanggha qaratqan ewzel siyasitini teshwiq qilish shundaqla bu heqte her bir oqughuchi hem ularning a'ilisige ray sinash jedwilini choqum tarqitish qatarliq tedbirlerni emeliyleshtüridighanliqi oqturulghan.

Uyghur aptonom rayonluq ma'arip nazariti, 5 - iyul ürümchi weqesidin kéyin peqet ürümchi shehiridila emes, pütün Uyghur élidiki ottura, bashlan'ghuch mekteplerge mexsus milletler ittipaqliqi dersliki orunlashturush, heptisige ikki sa'ettin kem bolmasliq we bu derslikni mewsumlük siyasiy terbiye dersliki émtihan so'alining 15 %ini igileydighan asasliq penler qatarigha kirgüzüshni békitken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet