Хитайниң мәмликәтлик сиясий-қанун йиғинида уйғур елиниң муқимлиқиға капаләтлик қилиш тәләп қилинди

Хитайниң сиясий қанун хизмәт йиғинида мәркизи сиясий қанун комитетиниң баш секретари җу йүнкаң уйғур елиниң муқимлиқиға капаләтлик қилип, узун муддәтлик әминликини ишқа ашурушни тәләп қилған.
Мухбиримиз ирадә
2011.12.22

Пәйшәнбә күни уйғур ели сиясий қанун комитети һәрқайси дәриҗилик сиясий-қанун орунлирини җу йүнкаңниң йолйоруқини яхши өгинип, дөләтниң бихәтәрлики вә җәмийәт аманлиқиға капаләтлик қилиш еңини өстүрүшкә чақирған.

Хитай һөкүмити йеқинқи йиллардин буян уйғур елиниң муқимлиқини, узун муддәтлик әминликини қайта-қайта тәкитләп, буни барлиқ мәсилиләрниң алдиға қоймақта. Әмма көзәткүчиләр, хитай һөкүмитиниң муқимлиққа һәқиқий зиян бериватқан миллий тәңсизлик, миллий кәмситиш, қош тил маарип, ишсизлиқ мәсилисини һәл қилмайватқанлиқини билдүрмәктә.

Җу йүнкаң уйғур елиниң муқимлиқиға капаләтлик қилишни тәләп қилған пәйттә, уйғур ели қораллиқ сақчи қисим тәркибидә қурулған тик учар қисми үрүмчидә маневир өткүзүп, өзиниң туюқсиз вәқәләргә зәрбә бериш сәвийисини синақ қилған.

Бу һәқтики хәвәрдә, бу қисимниң уйғур елиниң муқимлиқини сақлаш вәзиписини яхши орунлап, көзгә көрүнәрлик нәтиҗиләрни қолға кәлтүргәнлики баян қилинған.

Хәлқара кишилик һоқуқ органлириниң ейтишичә, уйғур елидә муқимлиқни қоғдаш уйғурларни бастуруш билән охшаш мәнигә келип қалған болуп, даириләр қаттиқ зәрбә бериш, йүз күнлүк зәрбә бериш қатарлиқ һәрикәтләр билән уйғурларни бастурмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.