Uyghurlar gu'angdung qanliq weqesige qarita dunya xaraktérliq namayish élip barmaqchi

3 - Iyul, jüme künidin itibaren shawgu'endiki qanliq weqege naraziliq bildürüsh namayishiliri uyushturulmaqchi. Bu namayishlar amérika, gérmaniye, kanada, gollandiye, shiwitsiye we türkiye qatarliq döletlerdiki Uyghur teshkilatlirining yétekchilikide élip bérilidu.
Muxbirimiz irade
2009.07.02

26 - Iyun küni gu'angdung ölkisining shawgu'en shehiride yüz bergen qanliq weqede, hazirghiche ikki kishining ölgenliki, ölgüchilerning birining ismining hashimjan emet ikenliki éniqlandi. Weqe heqqide oxshimighan köz qarashlar mewjut bolup, xitay da'iriliri bu weqening intérnétte élan qilin'ghan yalghan xewerdin kélip chiqqanliqini we bu yalghan xewer tarqitip weqege seweb bolghan kishining qolgha élin'ghanliqini élan qilghan bolsimu, emma neq meydan ehwalidin xewerdar kishiler buning meqsetlik we pilanliq halda Uyghurlargha qarshi élip bérilghan bir heriket ikenlikini ilgiri sürmekte.

Xitay da'iriliri hazirghiche weqening heqiqyi sewebi we weqening jinayi jawabkarlirini qolgha élip jazalash heqqide héchqandaq bir heriket qilmighan bolup, eksiche qanliq toqonushqa a'it xewerlerni qattiq qamal qilmaqta.

Bu ehwal weten ichi we sirtidiki Uyghurlarning qattiq ghezipini qozghighan bolup, dunya Uyghur qurultiyi özlirining yétekchilikidiki her qaysi döletlerde turushluq teshkilatlargha bu heqte pütün dunyadiki Uyghur teshkilatlirigha chaqiriq élan qildi.

Uyghur teshkilatliri özliri turushluq döletlerning hökümet we kishilik hoquq teshkilatlirigha weqe heqqide xet yollap, ularni xitay hökümitige bésim ishlitip, weqening heqiqi mahiyiti we ölgüchilerning sanini éniq melum qilishqa we jinayetchilerning jazalinishini telep qilip bésim ishlitishke chaqirmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.