Muxbirimiz erkin xewiri
2008-09-12
Eger bu qurulush rast yolgha qoyulsa bu Uyghur ilidin sherqtiki xitay ölkilirige tutashturulghan 3 - teb'iy gaz turuba yoli bolup qalidu.
Xitayning "junggo" géziti bu heqtiki xewiride Uyghur ilidin bashlinidighan yéngi turuba yolining sherqtiki fujyen'ge qeder tutashturulidighanliqini we xitay döletlik néfit shirkiti pilanlash bashqarmisining emeldari yang jyenlongning deslepki qurulush pilani kéler yilning bashlirida élan qilinidighanliqi toghrisida melumat bergenlikini bildürgen.
Xewerde mezkur gaz turuba yolining omumi uzunluqi 2008 - yili 2 - ayda bashlan'ghan 2 - liniyilik teb'iy gaz turuba yolining omumi uzunluqi bilen oxshash bolidighanliqini tekitligen bolup, gherbning gazini sherqqe yötkesh turuba yolining 2 - liniyisining omumi uzunluqi 9 ming kilométirdin ashidu. 20 Milyard 800 ming dollar meblegh sélinidighan 2 - liniyilik qurulushning 2011 - yili pütidighanliqi perez qilinmaqta idi.
Mezkur turuba yoli yiligha 30 milyard kupmétir gaz yetküzüsh iqtidarigha ige qilip layihilen'gen bolsimu, lékin yéqinda türkmenistan xitaygha gaz satidighanliqini élan qilghandin kéyin mezkur turuba yolining yilliq gaz yollash iqtidari 40 milyard kupmétirgha chiqirilidighanliqi ilgiri sürülmekte.
