10 Yil ichide tarim néfitlikining ishlepchiqirish miqdari yene bir hesse ashurulup, xitaydiki eng chong néfitlikke aylandurulmaqchi
Xewerde körsitishiche, xitay da'iriliri 7 - noyabir élan qilghan sanliq melumatlargha qarighanda, xitay néfit qidirip tekshürüsh da'iriliri peqet ötken yildila Uyghur élide 3 orunda zor miqdarda tebi'iy gaz we néfit zapisi bayqighan. Melum bolushiche, ötken yili Uyghur élide bayqalghan néfit we tebi'iy gaz zapisi 497 milyon tonnigha yétidiken.
Ashkarilinishiche, ötken yili bayqalghan néfit we tebi'iy gaz zapasliri xitayning "tarim néfitliki shirkiti" teripidin Uyghur élining kucha nahiyisi teweside, shimaliy tarim we ottura tarim wadilirida bayqalghan.
Kucha nahiyiside bayqalghan néfitlikning zapas miqdari eng zor hejimde iken.
Xewerde ashkarilinishiche, xitay néfit tarmaqliri 2010 - yilida tarim néfitlikining néfit we tebi'iy gaz ishlep chiqirish miqdarini üzlüksiz ashuridiken. Xitayning tarim néfitliki heqqidiki pilanlirigha asaslan'ghanda kelgüsi on yil ichide tarim néfitlikining ishlepchiqirish miqdari yene bir hesse ashurulup, xitaydiki eng chong néfitlikke aylandurulidiken.
Xitayning Uyghur éli néfitliklirini mes'uliyetsizlik bilen échip, Uyghur élining tebi'iy muhitigha we yerliklerning hayat yoligha tehdit sélip kéliwatqanliqi Uyghur éli weziyitini közitip kéliwatqan shexslerning ichil naraziliqini qozghap kéliwatqan idi.