Хитай даирилири “икки байрам мәзгили” дә уйғур елиниң мәдәнийәт базирида тазилаш елип беришни буйруған

Хитай даирилириниң йеқинда җайларға һөҗҗәт чүшүрүп, икки байрам вә қишлиқ тәтил мәзгилидә уйғур елиниң мәдәнийәт базирида тазилаш елип беришни буйруғанлиқи ашкариланди.
Мухбиримиз әркин
2011.12.28

Дуня уйғур қурултийи баянатчиси дилшат ришитниң чаршәнбә күни билдүрүшичә, хитай даирилири җайлардин бу йил 12‏-айниң 25‏-күнидин келәр йили 2‏-айниң 20 ‏-күнигичә мәдәнийәт базирида тазилаш елип берип, аталмиш бөлгүнчилик вә қанунсиз диний пикир-еқим қатарлиқ һәрикәтләргә зәрбә беришни тәләп қилған.

Даириләр қанун иҗра қилиш органлирини һәр қайси җайлардики нуқтилиқ кансерт, кара окәй қатарлиқ сәнәт, көңүл ечиш орунлирида, синалғу, нәшрият қатарлиқ мәтбуат әпкарлирида тазилаш елип беришкә буйруған. Дилшат ришит “икки байрам” ниң йеңи йил вә чаған байримини көздә тутидиғанлиқи, хитай аманлиқ даирилириниң йеқинда ақсу қатарлиқ җайларда тазилаш елип берип, бир қисим кишиләрни тутқун қилиш һәрикити бу һөҗҗәтниң роһи билән мунасивәтлик икәнликини билдүрди.

Мәзкур һөҗҗәттә, чәкләнгән сиясий мәзмундики һәр қандақ мәдәнийәт буюми вә мәдәнийәт мулазимитигә қаттиқ зәрбә бериш тәләп қилинған иди. Дилшат ришит мәзкур һөҗҗәтни тәнқид қилип, бу уйғур хәлқиниң пикир қилиш, пикир алмаштуруш вә билиш һоқуқиға қилинған еғир таҗавузчилиқтур, дәп көрсәтти.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.