Uyghur élidin 725 oqutquchi xitay ölkilirige xitay tili terbiyisi üchün yolgha sélin'ghan

Xitay metbu'atlirining xewer qilishiche, Uyghur élidiki ottura bashlan'ghuch mekteplerdin 725 neper oqutquchi, xitayning béyjing, shangxey, tyenjin qatarliq sheherlirige xitay tili boyiche bir yilliq telim ‏- terbiyige ewetilgen.
Muxbirimiz shohret hoshur
2010-09-14
Share

Xewerde bildürülüshiche, Uyghur élidiki qosh tilliq ma'arip qurulushigha, xitay merkez maliyisidin 446 milyon yüen, yerlik maliyidin 10 milyon yüen mexsus xirajet ajratqan.

Pilan boyiche, xitay 2009 ‏ ‏- yili bilen 2012 ‏ ‏- yili arisida jem'iy, 2000 oqutquchini xitay ölkiliride terbiyilimekchi. Xitay metbu'atlirida atalmish"qosh tilliq ma'arip " boyiche terbiyiliniwatqan we ishqa chüshüwatqanlar heqqide köplep xewerler bériliwatqan bolsimu, qosh tilliq ma'arip sewebidin ishsiz qalghan Uyghur oqutquchiliri we ularning turmush mesililiri heqqide héchqandaq melumat bérilmeywatidu.

Xitay metbu'atlirida yene atalmish qosh tilliq ma'aripqa qarita yerlik xelqning naraziliq pikir we endishilirimu izchil cheklinip kelmekte.

Uyghur élining siyasiy weziyitidin qarighanda, xitay da'irilirining Uyghur milliy kimlikini rayonning muqimliqigha asasliq tehdit dep körüwatqanliqi we bu kimlikni ajizlashturush üchün, Uyghur til ‏- yéziqini yoq qilishqa téz we chong qedem bilen heriket qiliwatqanliqi ashkarilanmaqta.

Emma zorigha élip bériwatqan bu siyasetlerning xitay kütkendek netije bérishigimu bir türküm közetküchiler guman bilen qarimaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet