Wéytnam xitayning talash - tartish ichidiki taqim arallarda sayahet rayoni berpa qilish pilanigha naraziliq bildürdi

Xitayning jenubiy déngizdiki igilik hoquqi talash - tartish qiliniwatqan taqim arallarda sayahet rayoni berpa qilish pilani wéytnamning naraziliqini qozghidi. Xitay mezkur pilanini ötken peyshenbe küni élan qilghan idi.
Muxbirimiz shohret hoshur
2010.01.05

Buninggha qarita tünügün wéytnam tashqi ishlar ministirliqi mexsus bayanat élan qilip, xitayni mezkur pilandin derhal waz kéchishke chaqirghan. Bayanatta eger xitay mezkur pilandin waz kechmise taqim arallar weziyitining téximu jiddiylishidighanliqi eskertilgen.

Jenubi déngizdiki Paracels we Spratlys taqim arallirining igilik hoquqi, xitay, wéytnam, filipin, bruniy qatarliq döletler arisida uzundin béri talash - tartish qilinip kelmekte. Bolupmu bu arallarda zor miqdarda tebi'iy bayliqlarning bayqilishi tereplerning mezkur arallargha qarita igidarchiliq ishtihasini kücheytmekte.

Wéytnamning naraziliqigha xitay bügün jawab qayturghan. Xitay tashqi ishlar bayanatchisi wéytnamning naraziliqigha diqqet qilghanliqini bildürüsh bilen aralning igilik hoquqini munazire qilishqa bolmaydighanliqini, chünki uning xitaygha tewe ikenlikini tekitligen.

Wéytnam ötken ayda rusiyidin yéngi tiptiki qoral sétiwélish üchün toxtam imzalighan. Közetküchiler wéytnamning bu qétimqi qoral sétiwélish pilanini taqim arallar mesiliside xitayning tehditige qarshi teyyarliq dep qarimaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.