Wakaletsiz milletler teshkilati xitayning xotendiki basturush herikitini eyiblidi

Bayanatta mundaq déyildi “Sherqi türkistanning xoten shehiride 18 ‏-iyul künidiki qanliq weqede 20 kishining ölgenliki ilgiri sürülüwatidu؛ emma xitay terep weqe heqqidiki uchurlargha cheklime qoyup, weqeni öz mudd'asi boyiche tonushturushqa urunuwatidu.”

 Bayanatta xotendiki weqe üstide musteqil tekshürüsh élip bérilishi kérekliki tekitlendi. Bayanatning axirida, xitayning yillardin béri Uyghurlarning pikir we diniy erkinlikini chekligenliki shundaqla Uyghurlargha qarita izchil halda zorawanliq yoli bilen siyaset yürgüzüwatqanliqi tenqid qilindi.

Xitay da'iriliri 18 ‏-iyul weqeside hujumchilarning töt kishini öltürgenlikini we xitay saqchilirining 14 hujumchini étip öltürgenlikini bildürgen idi. Bir qisim közetküchiler, xitayning weqeni bir terep qilishta, heddidin artuq küch qollinip qanliq weqening hejmini chongaytiwetkenlikini bildürmekte.

Bu xil qarashtiki közetküchiler, hujumchilarning qollirida iptida'iy qorallar bolghanliqi üchün ularni pütünley tirik qolgha chüshürüsh we sot arqiliq bir terep qilish mumkinchiliki barliqini, emma xitay Uyghurlargha öz wetendashliri qatarida qarimighanliqi üchün, hujumchilargha chet'el tajawuzchiliri qatarida mu'amile qilip, neq meydanda qirip tashlighanliqini, buning xelq'ara ehdinamilerge xilap ikenlikini bildürmekte.